Z palencom pjelnjene praliny su swójbny měr w bayerskej swójbje skazyli: Wowka bě swojemu wnučkej tyzku pralinow dariła. Dokelž pak běchu te z alkoholom pjelnjene, chcyše mać jědnaćelětneho hólca swoju přichodnu mać wobskoržić. Policisća 67lětnu wowku zazwonichu. Ta policistam potwjerdźi, zo njebě sej palenca w pralinach wědoma a zo swoje zadźerženje wobžaruje. Mać hólca skóržbu na to zaso cofny. Praliny wšak hólc jědł njebě. Hižo při woptanju wón prěnju hnydom zaso wupluny.

Wosrjedź jězby z awta padnył je 28lětny w Mnichowje. Kaž policija zdźěli, bě so wón na městnje sobujěduceho wo durje awta zlehnył, kotrež so njejapcy wočinichu. Snadnje zranjeneho su jeho w chorowni ambulantnje zastarali. Kaž policija zhoni, njebě muž připasany. Za wodźi­dłom sedźeše jeho mandźelska.

Špatniše žně karpow

Picnjo (dpa/ch/SN). Lětuše žně karpow njeběchu w Braniborskej tak wunošne kaž wočakowane. Žně běchu špatniše hač loni, praji Lars Lettmann, jednaćel krajneho rybarskeho zwjazka Braniborska-Berlin. Dokładne ličby pak hišće njepředleža. Štóž chce sej silwesterskeho karpa kupić, dyrbi z tym ličić, zo dóstanje we wikowanju skerje mały, měni Dettmann. Přičina špatnišich žnjow je ekstremnje suche lěćo. W mnohich hatach bě přemało wody, tak zo njemějachu karpy kislika dosć. Jich žně traja wot septembra hač do nowembra. Z někotrych hatow dyrbjachu karpy z nuzy wułójić, zo njebychu zahinyli.

Zajim za dźeń nawróćerjow

We wubědźowanju wo najrjeńšeho mopsa je wobsedźerka swojeho lubuška w Kijewje hodownje zwoblěkała. Hač bě z tymle outfitom wuspěšna, njeje znate, na kóždy pad pak je to dobry zazběh prawosławnych hód. Foto: dpa/Serg Glownyj

Berlin (dpa/SN). Posłužbowe dźěłarnistwo ver.di chce přichodne lěta z wulkej kampanju wo wyše renty wojować. Wu­wiće rentoweho niwowa je centralne socialnopolitiske prašenje přichodnych lět, zdźěli šef ver.di Frank Bsirske. Dźěłarnistwo staja tele prašenje cyle horjeka na politiski dnjowy porjad. Předsydstwo Němskeje rentoweje zawěsćernje porno tomu warnuje před přesylnym woteběranjom rezerwow rentoweje kasy. Za ver.di ma tema dimensiju kaž w zašłych lětach minimalna mzda, za kotrejež zawjedźenje bě dźěłarnistwo wojowało. Renta měła přibližny žiwjenski standard zawěsćić. Rentowy niwow – poměr wysokosće renty přerězneho rentnarja k přerěznej zasłužbje – leži pola něhdźe 48 procentow. Pod 43 proc. njeměł tón po politiskich postajenjach hač do lěta 2030 spadnyć.