Wolejbulisća ST Viktorije Worklecy přewjedźechu před tydźenjomaj intensiwne treningowe lěhwo wot pjatka do njedźele w swójskej hali. Trenar a hrajer Stefan Wjeńka bě naročny program z kondiciskeho a mócneho treninga, ale tež kubłanja jednotliwych hrajnych elementow zestajał. Ale tež widejowe analyzy, rozmołwy z jednotliwymi hrajerjemi a wólba kapitana stejachu na planje. Nimo toho běchu po wotchadźe třoch hrajerjow někotre grawěrowace personelne změny w mustwje. Zo pak tež wjeselo překrótko njepřińdźe, za to rěčitej zhromadna pizza a wječorne piwo na wjesnym swjedźenju w Smječkecach.
Awtor dźensa
Tomaš Faska
Jenož derje, zo smy wčera popołdnju před wobrazowkami dožiwili zwjeselacy sportowy podawk, kiž sej bjeze wšeho dwěla zasłuži něšto k tomu napisać. Hewak bych drje so čuł winowaty, so němskej kopańcy wěnować, štož so mi mjeztym woprawdźe wjac nochce. Tuta je za mnje doskónčnje wotjěła Krakecam. Ze spokojnosću a wolóženjom jeničce na wědomje bjeru, zo su wčera popołdnju skónčnje njewuspěšnemu a njesebjekritiskemu narodnemu trenarjej Flickej wupowědźili, štož bě woprawdźe najwjetši čas. Hdyž-li nic pře pozdźe, hladajo na klětuše europske mišterstwo w našim kraju. Ale, njech je, kaž je.
Měšćanske běhi w Budyšinje
Za 29. Budyski měšćanski běh je so 1 138 běharkow a běharjow přizjewiło. Tradicionelny běh zahaji so sobotu, 9. septembra, w 10 hodź. na Młynkec łuce z běhom za swójby. Po tym móža so wobdźělnicy na najwšelakorišich čarach na distancach wot 400 metrow hač do 10 km wubědźować. Dźěćace a šulerske wubědźowanja přewjedu so w stadionje na běžni 400 m, hłowne běhi w sportowym kompleksu Humboldtowy haj.
10.00 hodź. swójby a bambinije
10.30 hodź. distancy 0,8/1,2 km
12:45 hodź. distanca 3 km
13:45 hodź. 800 m za kóždeho
14:15 hodź. distanca 10 km
14:20 hodź. distanca 5 km
Sport w Delanach
We wobłuku babylěća w Ralbicach wubědźuja so dźensa wječor wot 20 hodź. pod swětłomjetakami wohnjowi wobornicy. Njedźelu steji na programje Ralbičanow konjacy sport, a to wot 13 hodź.
Jenož pokalne koparske hry
Na krajnej a tež na wokrjesnej runinje hraje so jutře a zajutřišim wo zaćah do přichodneho koła. Tak dyrbja Chróšćenjo jutře na přikład do Lubuša pućować a lokomotiwa z Lipska pojědźe do Budyšina.
09.09. 12:30 ST Lubuš II –
SJ Chrósćicy II
09.09. 15:00 Traktor Malešecy –
ST Radwor
09.09. 15:00 TSV Połčnica II –
Wóslink/Skask./Kulow II
09.09. 15:00 HZ Wóspork –
W. Dubrawa II/Radwor II
SJ Njebjelčicy –
FSV Łuty II 4:1 (1:0)
Zestawa domjacych: Hahn – Reinecke, Hanuza, Domš, Matješk, Lehmann (Wagner), Čornak, Hrjehor, Rudolf, Herrmann (Schulze), Rachela
K třećemu hrajnemu dnjej witachu čerwjene košle koparsku rezerwu z Łutow. Po prěnimaj njezbožownymaj hromaj chcyše sej SJN prěnje dypki na konće zawěsćić.
Prěni połčas bě přerosćeny. FSV Łuty dyrbjachu hižo w prěnich mjeńšinach měnić. Přećiwniski wrotar bě so zranił. Jako narunanje přińdźe pólny hrajer. Přewaha SJN bě zahe pytnyć. W 40. min. zamó nowačk Rachela kulowatu kožu po róžku do přećiwniskich wrotow sunyć. Ze stawom 1:0 dźěše tež do połčasa.
ST Radwor –
Natwar Němske Pazlicy 1:1 (0:1)
Zestawa domjacych: Ehrlich - Paška (65. Mička), Šěrak, Pěčak, Glücklich, Castejon (83. Hetaš), Omran, Nuk, Reinecke, Schulze (87. Jatzwauk), Hančik (92. Dej)
Po wuspěšnym derbyjowym dobyću w Ralbicach chcychu Radworscy koparjo rozmach z Delan sobu do přichodneje winowatostneje hry wzać a sej dalše dypki wudobyć. Nadawk pak njebě runjewon jednory.
Na spočatku trjebachu domjacy tróšku časa, zo bychu so do hry dóstali. Tuž namakachu přećiwnicy přeco zaso dźěry, kotrež pak móžachu Radworscy škitarjo spěšnje zaso zatykować. Bojownisce njemóžeše hrajerjam trenarja Petera Grenzemanna žadyn porok činić. Z tutej bojownosću móžachu sej hosćićeljo přeco zaso bule wuwojować a konterować. Jenož před wrotami njeběchu runjewon wuspěšni. Jeničce zmylk w hrajnym natwarje zniči dotal stabilnu hru. Zhubjenje bulow wotewěraše dźěry na křidłomaj. Jednu tajku přećiwnik wuži a w 39. min. k 1:0 trjechi. Hač do wothwizdanja pak bě Radwor lěpše mustwo.
SJ Drjewnica –
SJ Chrósćicy II 0:2 (0:0)
Zestawa hosći: Škoda – Sćapan (82. Klemenc), M. Donat, Zynda, Mark (68. Kola), Domaška, Handrik, Liznar (57. Matik), B. Donat (82. Graf), Zahrodnik, Paška
HZ Rakecy/Minakał II –
ST Marijina hwězda 0:4 (0:4)
Zestawa hosći: Matik – Wróbl, K. Pakoßnik, Weclich, Peschmann (63. Zynda), R. Cyž, Ch. Cyž, Zelnak, Eldor, Kurink, Bulank (86. Šnajder)
Znowa dyrbjachu koparjo Marijineje hwězdy wonka nastupić. Tónraz dźěše jězba k druhemu zastupnistwu Rakec, kotryž twori wot noweje sezony hrajne zjednoćenstwo z druhim mustwom z Minakała.