Štyri lěta dyrbja serbscy fanojo kopańcy hišće čakać – hač k přichodnej Europeadźe. Ale přiwšěm je hosćićel za přichodny turněr hižo namakany. 2028 hraja w sewjernej Italskej, pola słowjenskeje a frijawlskeje mjeńšiny. Turněr twori w oktobru ćežišćo telewizijneho magacina Wuhladko. Dale wobswětla we wusyłanju mjeztym 30 lět wobstawace serbske młodźinske towarstwo Pawk, w „dwurěčnych wsach při Klóšterskej wodźe“ skutkowaceho wobydlerskeho policista Andréja Kobera kaž tež spočatki a wuwiwanje serbskeje telewizije za dźěći, „kotraž je so w minjenych 30 lětach chětro změniła“.

Telewizija MDR pokaza Wuhladko jutře, sobotu, w 11.45 hodź. Wospjetowanje na samsnym sćelaku slěduje póndźelu, 7. oktobra, w 6.45 hodź. Telewizija RBB wusyła magacin sobotu, 12. oktobra, w 13.35 hodź. W mediatece ARD je Wuhladko wot jutřišeho cyłe lěto kóždy čas přistupne. 

3.10. – 9.10.2024

Budyski filmowy ­palast:

„Stara garda“ so rozžohnuje

Budyšin. „Open mic night“ je format, w kotrehož wobłuku móža so wšitcy zajimowani spěwarjo, přewodźane wot profesionalneje band, z (přizjewjenymi) titulemi po přećach na jewišću wuspytać. Dźensa, pjatk, su mikrofony Budyskeho Kamjentneho domu wot 20 hodź. znowa přistupne. Zdobom woznamjenja jutřiše zarjadowanje cezuru: Posledni raz postara so band, w kotrejž hrajetaj mjez druhim Torsten Wiegel a Malte Rogacki, wo hodźace so zynki. W běhu wječora chcedźa „staflowy stab“ skupinje Die Baumschule přepodać, kotraž format přichodnje wuhotuje. Zarjadowanje je darmotnje přistupne. Wutoru, 1. oktobra, rěka na samsnym městnje zaso „Night of the living vinyl“. Zajimcy móža swoje najlubše winylowe zynkonošaki sobu přinjesć a sej je mjez sobu předstajić. Tačelakaj stej wot 19 hodź. bjezpłatnje k dispoziciji.

Časowa jězba do srjedźowěka

We winowcowym wudaću Christin Herrmann jako „die herrmann“ swoje měnjenje hladajo na prašenja „čeja sy“ zwuraznja, kotrež so jej hižo husćišo staješe. Jedna so wo znate serbske (škitne!) wašničko, někoho do wěsteje swójby zarjadować chcyć – byrnjež wotpósłarjej snano jasne njebyło, kak spodźiwne so tute prašenje zwonka wsy začuwa. Zo je woblubowana spěwanska pedagogowka a hłosotwórča z Lipska tež rysowarka, jeje twórby w Rozhledźe pokazuja.

Wo lěsu jako „kluč za derjeměće“ piše dr. Justyna Michniuk –certifikowana strowotna trenarka lěsnych kupjelow – a wopisuje na přikład dušine a ćělne lěpšiny pohibowanja w přirodźe a z tym zwisowace pedagogiske aspekty lěsa. Dale rozkładźe lěsne postawy mytologije a kak so serbska rěč do tutoho koncepta integrować hodźi.

Hač drje Serbja tehdy wjelki lubowachu, praša so prof. dr. Bernd Koenitz. W městnostnych mjenach Łužicy namakaja so mjez druhim informacije wo něhdyšich wobstejnosćach a měnjenjach ludźi wo dźiwich psach a druhich zwěrjatach. Tute Koenitz na zakładźe onomastiskich a rěčespytnych principijow wuhódnoći.