Washington/Seoul (dpa/K/SN). Sewjerna Koreja je USA hrozyła, zo nadpadnje amerisku pacifisku kupu Guam z raketami, zapyrjo z tym dale jedyn z najstrašnišich konfliktow na swěće. Ataka móhła so kóždy čas wuwjesć, šef stata Kim Jong Un trjeba to jenož přikazać. USA dyrbjeli ze swojimi njesłyšanymi wojerskimi prowokacijemi přestać, potom „njebychmy k njeparujomnym wojerskim naprawam nuzowani byli“, zwurazni rěčnik wójska.
Tele wozjewjenje je z Pjönjanga jeno někotre hodźiny po tym přišło, zo bě prezident Donald Trump Sewjernej Koreji indirektnje z wojerskej namocu hrozył. Jeli budźe Sewjerna Koreja ze swojimi hroženjemi pokročować, „znapřećiwimy tomu z wohenjom, złósću a sylnosću, kajkež je swět hišće dožiwił njeje“.
Swojich dobrych kucharskich kmanosćow dla njeje Thailandźan do němskeho jastwa trjebał. Kaž zwjazkowa policija w Karlsruhe zdźěla, bě sudnistwo 43lětneho mjeńšich njeskutkow dla k 3 800 euram chłostaja abo sto dnjam jastwa zasudźiło. Dokelž njemóžeše wón pokutu zapłaćić, běchu jeho zajeli. „Chětro zadwělowany“ Thailandźan na to swojeho šefa, hosćencarja w Karlsruhe, telefonisce wo pomoc prošeše. Tón žadanu sumu bjez wahanja zapłaći, dokelž „tajkeho dobreho kucharja nihdźe wjace njenamakaš“.
W 52 dnjach 5 000 kilometrow běžała je 59lětna žona w USA. Yolanda Holder z kaliforniskeho Corona bě so 18. junija w New Yorku na puć podała. Minjenu nóc je pućowanje po 4 988 kilometrach skónčiła. Sportowča zmištrowaše wšědnje něhdźe sto kilometrow a popřa sej w nocy jenož krótki wotpočink.
Berlin (dpa/SN). Nastork předsydy FDP Christiana Lindnera k polěpšenju poćahow k Moskwje a k „zakapslowanju“ konflikta połkupy Krim dla je w Ukrainje raznu kritiku zbudźił. „Smy znjeměrnjeni, zo někotři politikarjo, kaž nětko šef FDP Christian Lindner, stajnje zaso spytaja, wočiwidne ranjenje ludoweho prawa ignorować abo samo wusprawnić“, rjekny wonkowny minister Ukrainy Pawel Klimkin nowinarjam Bild. „Tak agresora k dalšim złóstnistwam pozbudźeja a su tak sobuwobdźěleni na złóstnistwach Putina.“ Klimkin namołwješe, wšitke politiske a diplomatiske srědki k „wuswobodźenju Krimy“ wučerpać.
Lindner bě kónc tydźenja namołwjał, poměr k Ruskej polěpšić a anektowanje Krimy přez Rusku jako „dołhodobny prowizoriji“ wobhladować. Tak móhł ruski prezident Putin składnosć dóstać, swoju politiku změnić, bjez toho zo by jako přěhračk stał. Potom móhli so tež sankcije přećiwo Ruskej zaso zběhnyć.
Drježdźany/Podstupim (dpa/SN). Poměrnje wysoke dawkowe sadźby so na pjenježne połoženje sakskich komunow lědma wuskutkuja. Loni docpěchu dawkowe dochody komunow znowa jenož 60 procentow zapadoněmskeho niwowa. Tole zwěsća Bertelsmannowa załožba w dźensa wozjewjenej Komunalnej financnej rozprawje. Na wobydlerja ličene su sakske komuny 778 eurow dawkow wuzbytkowali. W cyłoněmskim přerězku wučinja tale suma 1 178 eurow. Lipsk na přikład zaběra hladajo na dawkowe dochody 84. městno wšěch 103 bjezwo- krjesnych městow. Při tym je Sakska pola ležownostneho a přemysłoweho dawka mjez tymi krajemi, kotřiž sej najwjace žadaja. Tole pak na cyłkownje snadnych dochodach ničo njezměni. Na kóncu stej hospodarska struktura a hódnota imobilijow rozsudnej za to, kelko pjenjez komuny z dawkami woprawdźe zasłužeja, rěka w rozprawje załožby.
Grodk (JoS/SN). Za jědnaće młodych fachowcow a 14 nowych wučomnikow bě zašły pjatk rozsudny dźeń jich dotalneho powołanskeho žiwjenja. Ći jedni dóstachu swoje fachowe wuswědčenja, ći tamni swoje wukubłanske zrěčenje. A to, kaž je to mjeztym hižo lěta dołho w papjercownjach Hamburger Rieger, Dunapack a Spreerecycling z wašnjom, w cokorowej tiće. Lětsa wotmě so swjedźenski program na Grodkowskim hrodźe a bu wot šulerjow hudźbneho profila Wojerowskeho Lessingoweho gymnazija wobrubjeny.