Za cyłk konjaceho sportoweho towarstwa při Klóšterskej wodźe Pančicy-Kukow bě 24. jěchanski turněr dosć poradźeny, za lokalneju matadorow Pětra Bobku z Miłoćic a Křesćana Zahrodnika z Chrósćic skerje nic. Mnohostronski jěchar Křesćan Zahrodnik bě sej sobotu z walachom Mighty Maxom ramjenjowe zhibadło skóncował. Pětr Bobka spotorha z kobłu Cilku njedźelu popołdnju na zakónčacym skakanju njetrjebawši wjele žerdźow. To jeho wězo chětro mjerzaše. Wobaj konjacaj sportowcaj měještaj po sobotnej dresurje a přezpólnym jěchanju jara dobre wuhlady na titul sakskeho mištra w mnohostronskim jěchanju – Miłočan z kobłu Cilku, Chróšćan z kobłu Namibiju. Pětrej Bobce zwosta na kóncu hišće titul wicemištra, Křesćanej Zahrodnikej pak dlěša zranjenska přestawka. Mytowali su na woběmaj dnjomaj hišće dalše domoródne dwójki, kotrež zawěsćichu sej dobyćersku seklu.
ST Haselbachtal
– SJ Njebjelčicy 1:2 (1:1)
Zestawa hosći: Hahn – Čornak, Hanuza, Deleńk, Hrjehor, Kral, Pawlik, Hommel, Schulze, Dubaw, Korjeńk (89. Domš)
We wonkownej hrě spjelnichu hrajerjo prěnjeho koparskeho mustwa Sportoweje jednotki Njebjelčicy nimale wšitke nadawki trenarja Handrija Krawčika. Wot wšeho spočatka steješe škit wěsće při wočakowanych spěšnych a strašnych nadběhach Haselbachtalčanow. Po konteru přez lěwu stronu posłuži Sandro Schulze Handrija Korjeńka, kotryž přihraty bul hnydom do dołheho kuta k nawjedowanju 0:1 zběhny (6.). Chrystof Dubaw pak třěli dwójce přez łatu (11.,17.) a Stefan Kral wrota tohorunja snadnje misny (27.). Po nadběhu přez prawu stronu z niskej třělwu do kuta pak poradźi so domjacym wurunać. Njebjelčenjo so dale wuspěšnje sylnym nadběham domjacych wobarachu. Tak so stronje při stawje 1:1 měnještej.
Druhi WORKWUB (WORKlečanske WUBědźowanje) je dorosćenym a dźěćom znowa tójšto wjesela wobradźił. Dźěći běhachu napřemo, mjetachu buliki a pospytachu so w dalokoskoku. Po kofejowej přestawce wubědźowachu so swójby w staflowym běhu. Tón přewjedźechu Worklečanki a Worklečenjo lětsa pod motom „Čiń sobu, čiń kaž tamni, čiń lěpje“. Sydom swójbnych mustwow wojowaše na parcoursu, kotryž wjedźeše přez wjacore zadźěwki, wo najlěpše časy. Nimo toho móžachu sej wotpisanja pjeć minusowych sekundow wubědźić, mějachu-li prawe wotmołwy na kwisowe prašenja.
Dobył je lětuše wurisanje team „Viktoria Łučny puć“ z jednej sekundu předskoka porno mustwu „Noten Chaoten“. Třeće městno wobsadźi team „Schorf Fale“.
Wulki dźak słuša Hozec swójbje, kotraž je wšo organizowała, wšitkim pomocnikam młodych swójbow, sportowemu towarstwu Viktoria Worklecy, Worklečanskej gmejnje, firmje ELDAKON a Šlapec pjekarni. Gernot Schweitzer
LSV Hory
– ST Radwor 2:2 (1:1)
Zestawa hosći: Kral – Schild, Henka, Šěrak, Bejmak, Omran, von Karwin, Zimmermann, Winar, Schulze (90.+2 Bauer), Kurjat
Ze zasłuženym dypkom wróćichu so Radworscy koparjo z Horow. Dalšej dypkaj pak su woni zapasli, přetož běchu krótko do kónca hry hišće 2:1 nawjedowali. Horjenjo spěšnje započachu a wukonjachu ćišć na Radworske wrota. W 11. min. mějachu po dalokim kopje přez Stefana Koarka tež wuspěch. Třělwa dźěše bjez dótknjenja hrajerjow přez šěsnatku do wrotow Bena Krala. Šokowani pak hosćo njeběchu. Poněčim namakachu so lěpje do hry a mějachu přez hłójčkowane bule Křesćana Bejmaka a wosebje Franca Winarja, kiž swobodnje stejo na wrotarju domjacych zwrěšći, dobre móžnosće (16., 17., 40.). Zbožo tež bě, zo domjacy hrajer bul ze zdalenosće pjeć metrow nimo sadźi (13.). Z wuběrnej paradu zadźěwa Kral wjetšemu zastatkej, jako wón wótru třělwu z krótkeje distancy wotwobara (18.). Dobre zasadźenje Toma Schulzy na prawym křidle přinjese hosćom wurunanje. Sylnu třělwu wotwobara Danny Püschel do swójskeje klětki (24.).
Za sezonu 2017/2018 maja volleyballistki prěnjeho mustwa ST Marijineje hwězdy nowu zestawu. Dźěl druheho zastupnistwa bu do prěnjeho přiwzaty. Tak hraje we wobwodnej lize-wuchod nětko tróšku změnjeny cyłk. Prěnja dypkowa hra budźe sobotu, 23. septembra w 14 hodź. w Pančicach-Kukowje. Tam nastupja Marijine hwězdźički přećiwo volleyballistkam ze Žitawy a přećiwo Ochranowskim volleyfantkam. Wotlěwa stejo: Jana Kralec, Jennifer Otto, Stefanie Montagowa, Patricia Šustrec, Tereza Wićazec, Johanna Fieglerec, Anja Markec, Christin Opicec, trenarka Daniela Kralec; sedźo wotlěwa: Anne Fünfstück, Carolin Wjeselina, Anne Šołćic, Pia Šołćic, Lydia Rachelic. Na foće pobrachuje Stephanie Schmidt.
Foto: Jana Kralec