Z wudaća: štwórtk, 16 nowembera 2017

Do pincy so zadobyli

Wojerecy. W nocy na wutoru zadobychu so njeznaći do pincy wjaceswójbneho domu na Wojerowskej Einsteinowej. Po tym­ zo běchu durje namócnje wočinili, pokradnychu 63lětnemu wobydlerjej kašćikaj piwa. Při dalšej pincy samsneho domu zwrěšćichu na durjach.

Chrósćicy (aha/SN). Z cyłkownje 53 afriskich krajow je Malawi jedyn z dźesać najchudšich. Christina Smolina ze Swinjarnje je zawčerawšim na přeprošenje towarstwa Domizna w Chróšćanskej wjacezaměrowej hali wo swojimaj přebytkomaj w Malawiju přednošowała.

Njeměr knježi mjez Budyšinkom a Plusnikecami. Nimale 700 wobydlerjow wokolnych wsow je peticiju Sakskemu krajnemu sejmej podpisało, wobydlersku iniciatiwu běchu hakle nalěto załožili. Wina na tym, tak praja, je zornowcowe předewzaće ProStein, kotrež tamnišu skału wobhospodarja. Plusnikečanska skała bě hač do 1990tych lět jedna z mnohich mjeńšich we Łužicy, doniž ju w lětomaj 2004 a 2005 njerozšěrichu, a wona přeńdźe na produkciju drobnje mlěteho zornowca.

Protest pak njezběha so jenož w Malešanskej gmejnje. Wšako dźe wo wjele wjace, dźe wo wohroženje strowoty přez drobny proch mlěteho granita, wo wobškodźenje domskich blisko skały, wo mócne rozbuchnjenja, wo transportne problemy přez wulkonakładne awta runje tak kaž wo ničenje krajiny. A wosrjedź njeje knježi strach wo tak mjenowany Čertowy kamjen, přirodny a stawizniski pomnik.

Na lětušej dźesatej regionalnej konferency Łužiska jězorina w Hórnikecach pokazachu wšelacy inwestorojo na aktualne problemy w praksy. A žadachu sej wolóženje, předewšěm nastupajo wulku běrokratiju.

Wot apryla wobhospodarja Armin Hoffmann, jednaćel towaršnosće Hotelowy a dožiwjenski park Hornja Łužica zwr, na sewjernym přibrjohu Bjerwałdskeho jězora gastronomiju „Kombüse Strandkost“. K dalšim inwesticijam słuša 43 metrow dołha a wosom metrow šěroka hóstna łódź, kotraž ma 330 městnow pod hołym njebjom a 320 salonowych městnow. Tuchwilu leži wona hišće na kótwicy w Sauerlandźe. Klětu pak ma prěni raz po Bjerwałdskim jězoru jěć. Planowany je połdrahodźinski linijowy wobchad jako 14kilometrowska kołojězba z přistawjenjom w Hamorje, Klětnom a Delnim Wujězdźe. Předwidźane su dale dožiwjenske jězby za kwasy, swjedźenje předewzaćow, silwester abo jubileje. Łódź ma so tak wuhotować, zo je tež ludźom z handicapom přistupna. Zastarać chcedźa hosći na njej a na přibrjohu ze swójskeje gastronomije.

ST Kinspork

– ST Radwor 4:1 (1:0)

Zestawa hosći: Ch. Šěrak – Zähr, F. Šěrak, Henke, Wjeńka, Bejmak, Bauer (44. Omran), Zimmermann, Winar (64. Mark), Kurjat, Schulze

Minjene tydźenje dyrbjachu koparjo Radworskeho ST stajnje zaso přećiwo načolnym mustwam wojować. Njedźelu podachu so do Kinsporka a nadźijachu so tam třoch dypkow.

Hnydom w prěnich mjeńšinach bě pytnyć, zo je to wažna hra za wobě mustwje, a na woběmaj bokomaj jewjachu so dobre šansy. W 12. min. pak nawjedowachu hosćićeljo po wólnym kopje. Zadnje Radworske mustwo njezamó bul kontrolować a tak přetwori Robert Rüthrich k 1:0 za Kinspork. Hra wosta dale wote­wrjena, najlěpše składnosće domjacych pak wrotar Chrystof Šěrak znješkódni. Na tamnym boku wuwostajichu Radworscy nadběhowarjo najlěpše šansy a njezamóchu bul tak we wrotach přećiwnika zaměstnić.

Njedźelu, 19. nowembra, maja wšitcy entuziasća-běharjo zaso składnosć, na tradicionalnym a mjeztym 25. jubilejnym wubědźowanju při Brusniku w Běłej Wodźe startować. W 10 hodź. móža tam w jednej ze štyrjoch wšelako dołhich distancow 0,8 / 2 / 5 a 10 km swoju spěšnosć a wutrajnosć měrić. Wobdźělnicy wšitkich štyrjoch distancow zhromadnje startuja.

Čary powjedu zwjetša po płonych a runych lěsnych pućikach, najdlěšej pak tež zaso přez dołhi drjewjany móst za pěškow a kolesowarjow, přez Brusnik. Je to pjeć kilometrow dołha kołočara. Zetkanišćo běharjow a start stej kaž přeco­ při Běłowodźanskim znatym Dźěćacym a wočerstwjenskim centrumje.

Běhi budu lětuše poslednje hódnoćenske wurisanja za rjadne lisćiny Drježdźanska wobwodna serija, Delnjołužiski cup a Pokal wjercha Pücklera. Zarjadowanje organizuje a přewjedźe znowa TSG KW Hamor-Běła Woda. Tež lětsa chcedźa so někotři serbscy lubowarjo běhanja tam zaso sobu wubědźować. Jurij Nuk