Z wudaća: póndźela, 11 měrca 2019

Awtor dźensa

Jurij Bjeńš

Swój dźensniši nastawk wěnuju wosebje młodźinskim trenarjam serb­skich koparskich cyłkow. Tójšto lět trenuju nětko hižo młodźinu F Sokoła Ralbicy/Hórki. Najbóle mje spokoja, hdyž wobkedźbuju wuwiće jednotliwcow. Tajnje so potom přeco nadźijam, zo tež pozdźišo raz pola 1. mustwa Sokoła Ralbicy/Hórki runje tak wo dypki wojuja kaž pola młodźiny F. Realita wšak je hinaša. Mnozy po někotrych lětach prosće wjac kopańcu nje­hraja. Maja hinaši hobby, naj­časćišo pak faluje mo­tiwacija, dokelž sylni koparjo na přikład do Kamjenca abo Budyšina woteńdu a tak so mustwo roztorha a kwalita so pozhubi.

Na nowinarskej konferency měješe Claus-Dieter Wollitz njedawno překwapjenku spřihotowanu, jako wóno rozjasni, zo swoje zrěčenje, kotrež běži hišće hač do junija 2020, spjelni. A to njewotwisnje wot toho, w kotrej lize budźe FC Energija wot awgusta 2019 hrać. „W zašłym lěću sym jara dobry poskitk druheho kluba wotpokazał, dokelž so z Choćebuzom, Energiju kaž tež z fanami a sponsorami absolutnje identifikuju. Wězo budu wšo dać, zo na kóncu sezony zachowanje klasy swjećimy. Ale tež w tamnym padźe wostanu Choćebuzej swěrny a staram so wo nowy start.“ To rjekny coach Wollitz, kiž prócuje so aktualnje wo to, podlěšić zrěčenja z koparjemi aktualneho kadra. „Znamjenja njesteja špatnje, zo změjemy při padźe hórkeho zestupa w Choćebuzu dobre mustwo.“ Georg Zielonkowski

Sedme sněhakowarske lěhwo SWŠ Budyšin w Kyrkonošach

Nimale kompletny 7. lětnik Serbskeje wyšeje šule (SWŠ) Budyšin je so zašły tydźeń­ w čěskim kurowym městačku Janské Lázně na mjeztym hižo sedmym sněhakowarskim lěhwje swojeho kubłanišća wobdźělił. Nimo toho su sportowi wučerjo tež lětsa zaso šulerjam 8. lětnika zmóžnili so w spěšnosněhakowanju wukmanić. Tak sněhakowaše 23 šulerjow 7. lětnika zhromadnje z dźesaćomi 8. lětnika. W štyrjoch skupinach su woni wot póndźele do štwórtka spěšnosně­hakowanje nawuknyli abo swoju techniku po­lěp­šili. Nimo třoch instruktorow sněhakowarskeje šule Šafář wukubłachu serbskich a němskich wobdźělnikow sportowaj wučerjej Anja Hübnerowa a Jan Hrjehor.

San José/Panama-město (B/SN). 23 mło­dostni z biskopstwa Magdeburg a jich přewodźerjo wobdźělichu so na lětušim Dnju swětoweje młodźiny w Panamje. Do zetkanja z bamžom a 200 000 młodostnymi poby skupina w susodnej Kosta­ Rice, hdźež zeznajomi so z ludźimi a dožiwi tamnišu wulkotnu přirodu. W katedrali Cartago zetkachu Magdeburgčenjo sta młodych putnikow z mnohich krajow swěta. Tež 25 putnikow z biskop­stwa Drježdźany-­Mišno spomina rady­ na hospodliwosć w zdźěla jara chudych swójbach. Woni njezabudu doži­wjenja wěry, kotrež wšitke hranicy narodow přesahuja. Wosebje lubili su so wobdźělnikam Bože mšě z hudźbu a ryt­miskim spěwanjom. Přichodny Dźeń swětoweje młodźiny budźe za tři lěta w Portugalskej.

Dalekubłanje w Israelu