Slepo (CK/SN). Po tym zo je prawniski dohladowanski zarjad Zhorjelskeho wokrjesa płaćiwosć komunalnych wólbow w Slepjanskej gmejnje wobkrućił, je so tam wčera gmejnska rada skonstituowała. Z ćežkej wutrobu Manuela Wolf (wólbne zjednoćenstwo ST Lok Slepo) zwurazni, zo swój mandat w gmejnskej radźe cofnje. Wona je dźakowna za wólby, tež na čestnohamtske dźěło w gmejnskej radźe je so wjeseliła. „Wot lěća pak dyrbju swojeju staršeju hladać, tak zo dźěło we wjesnej radźe a zdobom w gmejnskej radźe njezmištruju“, Manuela Wolf swój rozsud wopodstatni. Tři tydźenje bě wo tym rozmyslowała. Ale žiwjenje „je druhdy hinaše, hač sej je přeješ“, wona rjekny. W Mułkečanskej wjesnej radźe pak chce dale sobu dźěłać.
Wotpadki zapalił
Budyšin. Wotpadkowe sudobjo je so předwčerawšim dopołdnja na Budyskej Jordanowej paliło. Wjacorym wobydlerjam so poradźi płomjenja zhašeć, prjedy hač wohnjowi wobornicy přijědźechu. Cyle w bliskosći spalenych zbytkow wuhladachu pasanća poł hodźiny pozdźišo muža, kiž drje chcyše runje spěrawe wotpadki zapalić. Přiwołani policisća na to 32lětneho identifikowachu. We wobłuku přepytowanja dyrbi kriminalna policija nětko zwěsćić, hač bě muž tež wotpadkowe sudobjo zapalił.
Dubrjenk. Mjeztym wosmy raz wuhotuje Krječmarjec swójba w Dubrjenku dworowy swjedźeń, a to njedźelu, 25. awgusta. Wot 11 hodź. porjedźeja tam wobjed, k čemuž zaklinči dujerska hudźba kapały „Hochsteinmusikanten“. Wot 14 hodź. wubědźuja so jěcharjo w kałanju wěnca, w 16 hodź. přizamknje so napřemojězdźenje konjacych zapřahow. Nimo toho budu jězby z konjacymi zapřahami móžne, wot 15.30 hodź. poskića potom kofej a tykanc. Na wopytowarjow čakaja dale paslenje za dźěći, skakanski hród a samotwarjene awta typa Hot Rod.
Saněruja farsku bróžnju
Wochozy (AK/SN). Šwjelowu bróžnju we Wochozach nětko saněruja, zdźěli wjesny předstejićer Mario Weber. Ćěslojo z Dźěwina su bróžnju za Wochožanskim farskim domom wottwarili. W Dźěwinje nětko jednotliwe dźěle saněruja a po potrjebje wuměnja. Na to chcedźa bróžnju zaso natwarić a za wšelake kulturne zarjadowanja a zetkanja wužiwać.
Narć (FAG/SN). Wot lětušeho nalěća zwoprawdźeja na terenje Narćanskeje wohnjowoborneje šule za katastrofowy škit wulkej twarskej naprawje. Tam nastawatej internat z połsta městnami kaž tež wukubłanske a zarjadniske twarjenje z wjacorymi specielnje wuhotowanymi wukubłanskimi rumnosćemi. Mjeztym zo ma internat kónc lěta dokónčeny być, chcedźa tamne twarjenje hižo za něhdźe dwaj měsacaj přepodać.
Kapacity wohnjowoborneje šule běchu dawno wučerpane, čehoždla hižo dlěši čas wo tym rozmyslowachu, zarjadnišćo rozšěrić. Nětko wužiwaja za to srědki tak mjenowaneje wukubłanskeje ofensiwy Swobodneho stata Sakskeje.
Kóždolětnje wukubłuja w Narću něhdźe 4 000 ludźi w najwšelakorišich wu- a dalekubłanskich kursach. Potrjeba pak je wo wjele wjetša, wšako dohromady něhdźe 80 wšelakich kursow poskićeja. Wot spočatka 1970tych lět Narćanska šula wobsteji. Je to jeničke centralne wukubłanišćo wobornikow w Sakskej.