Žurnalisća a wobydlerjo wo zjawnym rozprawnistwje diskutowali
Budyšin (SN/JaW). Žurnalisća maja swoje dźěło dokładnje wukonjeć, potom njeměli starosće z dowěru wužiwarjow swojich medijow měć. Tule tezu nastaji wčera wědomostnica Drježdźanskeje techniskeje uniwersity dr. Anna-Maria Schielicke na diskusiji Budyskeho měšćanskeho zwjazka CDU w sprjewinym měsće. Zwjazk bě pod hesłom „Medije w kritice – kak wone woprawdźe dźěłaja“ přeprosył, zo by so dźěławosći kaž tež wěryhódnosći nowinarstwa wěnował. Jako rozmołwnych partnerow witaše moderator Tobias Schilling nimo dr. Schielicke, kotraž poda někotre wuslědki slědźenjow wo medijach, reportera dźenika Sächsische Zeitung Ulricha Wolfa, programoweho direktora MDR Michaela Möllera a mnohich hosći, mjez kotrymiž běštaj tež zapósłanc CDU w Sakskim krajnym sejmje Marko Šiman a nawodnica Budyskeho studija MDR Bogna Korjeńkowa.
