Film wo Słowjanach w Němskej pokazali

Budyšin (SN/CoR). „Poprawom sej myslach, zo dokumentacija wo Słowjanach w Němskej hižo eksistuje, wšako su słowjanske korjenje z mjenow městow kaž Lipsk, Drježdźany a Kamjenica prosće hižo wučitajomne. Ćim wažnišo pak je, zo móžemy so dźensa prěni raz na filmowu jězbu wotkrywanja do stawiznow před 1 300 lětami podać. Dokudrama ‚Die Slawen in Deutschland – unsere geheimnisvollen Vorfahren‘ je wažny měznik, zo móžeš serbske stawizny rozumić.“ Takle rysowaše intendantka Srjedźoněmskeho rozhłosa (MDR) prof. dr. Karola Wille wčera wječor w Budyskim Serbskim domje wuznam kooperaciskeho filma mjez MDR, RBB a Arte, kotryž dožiwi tam před něhdźe 90 hosćimi swoju saksku premjeru. Do toho běchu jón hižo na filmowym festiwalu w Choćebuzu předstajili. Mjez wčerawšimi hosćimi běchu zapósłancy Sakskeho krajneho sejma Marko Šiman, Alojs Mikławšk (wobaj CDU) a Hajko Kozel (Lěwica), předsyda Domowiny Dawid Statnik a direktor Załožby za serbski lud Jan Budar kaž tež mnozy zastupjerjo MDR a produkciskeho mustwa filma.