Borbora Felberowa, nowinska rěčnica Domowiny a wosobinska referentka jeje předsydy, poda so na wuměnk
Wona njebě nihdy přećelka wulkich słowow, a přiwšěm wě słowa wušiknje sadźeć a je samo do narěčow splesć. Ze swojim dźěłom njeje so nihdy hordźiła a móže přiwšěm na něštožkuli zdokonjane zhladować. Borbora Felberowa, nowinska rěčnica Domowiny a wosobinska referentka předsydy Dawida Statnika, so kónc 2019 po 16 lětach w zastojnstwje na wuměnk poda.
Wjele lět w cuzbje
Lěta 1956 w Komorowje pola Rakec jako Borbora Wuhlerjec rodźena wotrosće w serbskim staršiskim domje, chodźeše w Rakecach do šule a maturowaše na Serbskej rozšěrjenej wyšej šuli w Budyšinje. Přizamkny so wolontariat pola tehdyšeje Noweje doby a štyri lěta trajacy studij žurnalistiki, kotryž z diplomom zakónči. 1980 nawróći so do Łužicy a dósta bydlenje w Budyskim Serbskim domje. W redakciji Noweje doby bě štyri lěta wotrjadnica za nutřkownu politiku.
