Wot póndźele Serbski rozhłós rano hodźinu dlěje wusyła

Budyšin (SN/CoR). Póndźelu budźe tak daloko, zo Serbski rozhłós potom wšědnje hodźinu dlěje wusyła. Tak budźe serbskorěčny rańši program MDR wot póndźele do pjatka hač do dźewjećich a sobotu hač do dźesaćich słyšeć. „Smy so za 6. januar jako termin rozsudźili, dokelž­ chcemy póndźelu z nowym programom tydźeń porjadnje zahajić. Dotal skutkuja sobudźěłaćerjo hišće měrni, wšako smy so sčasom na nowe wužadanje přihotowali. Sama so jara na dlěše wusyłanje wjeselu“, rjekny nawodnica Serbskeho rozhłosa a Budyskeho studija MDR Bogna Korjeńkowa našemu wječornikej. Po 30 lětach třihodźinskeho programa je sćelak MDR na přeće reagował a serbskorěčny radijowy poskitk wo hodźinu rozšěrił.