ST Kinspork/Łužnica – ST 1922 Radwor 0:6 (0:2)
Za Radworske mustwo zasadźeni: Šěrak – B. Grubert, Omran (76. L. Pěčak), M. Dźisławk, Wjeńka, Wjesela, Nuk (66. Wjacławk), Schöne (21. M. Grubert), Adam, Wróbl (83. Dej), Glücklich (76. C. Dźisławk)
Na pjatym hrajnym dnju wokrjesneje ligi dyrbjachu Radworscy koparjo do Łužnicy. W tabulce běštej mustwje tabulkowej susodaj, cyłk z Kinsporka pak měješe lěpšu diferencu wrotow. Nimo toho njebě hosćićel w hišće młodej sezonje žane přećiwne wrota dóstał. Na spočatku partije so kontrahentaj tróšku wobčuchaštaj. Radwor pak bě w dwubojach chětro šćipaty a wudoby sej tuž tójšto bulow za sebje. W srjedźnym polu hosćo tak postajowachu a domjacy agěrowachu zwjetša jenož z dołhimi bulemi. Tute pak běchu jenož w prěnim połčasu strašne, dokelž Radworscy zakitowarjo na to hišće nastajeni njeběchu. Ale před šěsnatku móžachu so tute nadběhi, hač na dalše, derje zakitować. Hižo zahe, w 7. min. móžachu Radworčenjo přez daloku třělwu Mateja Wjeńki z nimale 40 metrow 1:0 nawjedować.
