Socialne syće a online-poskitki tež za serbskich akterow dale a zajimawše

Budyšin (SN/MG). „Zawěsće njejsće nam to přicpěwali, my sej tež nic.“ Z tutymi słowami witaše šefredaktor Serbskich Nowin Marcel Brauman 30. meje 2024 wužiwarki a wužiwarjow Instagrama na nowy account wječornika. Dźensa sćěhuje profilej hižo wjace hač 1 000 wosobow. Zo je jenički serbski wječornik tutu ličbu sćěhowarjow (po nowej serbšćinje followerow) na platformje socialnych medijow docpěł, Braumana jara wjeseli: „Přejemy sej hišće wjac komentarow, rady tež kritiskich, wšako je nam žiwa wuměna mjez čitarstwom a redakciju wažna.“ Hladajo na to, zo sej wjetšina młodych ludźi informacije ze šmóratkom spřistupnja, budźe aktualne rozprawnistwo na digitalnych kanalach nimo ćišćaneje nowiny a jeje e-paper w přichodźe dale a wjetšu rólu hrać.