Prěni serbski protykar, farar Korla Herman Robert Rjeda, zemrě 14. wulkeho róžka 1900 w Budyšinje a bu na Tuchorju pochowany. Z nim zemrě najstarši čłon Maćicy Serbskeje, kotrejž bě wón při załoženju 1847 přistupił. Pozdźišo bě čestny čłon Maćicy. Jako syn fararja bě so 5. žnjenca 1816 w Smělnej narodźił. Ze stipendijom za syna serbskeho duchowneho wopyta Wjerchowsku šulu w Mišnje a studowaše po tym teologiju w Lipsku. Tam bě aktiwny čłon serbskeho Łužiskeho prědarskeho towarstwa. Po studiju bě najprjedy wot lěta 1839 do 1843 domjacy wučer pola zemjanskeje swójby von Rabenau w Rakecach. Wot 1843 bě dwaceći lět farar w Hućinje. 1844 bě mjez załožićelemi Klukšanskeho serbskeho ratarskeho towarstwa a wjele lět jeho zapisowar. 1856 namjetowaše a organizowaše w Hućinje prěnju wustajeńcu skotu w Serbach. Rjeda starosćeše so jara wo chudych Serbow na wsach. W lětomaj 1847 a 1848 bě špatnych žnjow dla chlěb jara drohi a lud tradaše hłód. Wón wuprosy sej wot wyšnosće a knježkow len a dari jón chudym, zo bychu sej z předźenjom lena něšto přizasłužili. Wšako bu předźeno tehdy derje płaćene.