W Radworju towarstwa schadźowanku za swójby aktiwnje podpěruja

Radwor (SN/VaŽ/MiR). Wjace hač 250 ludźi je sej wčera popołdnju do wjacezaměroweje hale „Slavija“ w Radworju na mjeztym 14. schadźowanku za swójby dojěło. Zarjadowanje, kotrež su Rěčny centrum WITAJ, Załožba za serbski lud a ZARI – syć za serbsku rěč a regionalnu identitu zhromadnje přihotowali, nabywa dźeń a wjetši zajim. „W Radworju napadnje, zo towarstwa tute zarjadowanje jara aktiwnje podpěruja“, rjekny hłowna zamołwita, wobdźěłarka projektow w RCW Michaela Hrjehorjowa. Lětsa su organizatoram Radworske sportowe towarstwo, tamniša staršiska iniciatiwa kaž tež młodźinski klub pomhali. Tutu zhromadnosć je tež nawodnica RCW dr. Beata Brězanowa wuzběhnyła, jako hosći witaše. Zo so zarjadowanje jedne lěto w Chrósćicach a druhe w Radworju wotměwa, je so jako wuspěšne wopokazało. W kulturnym programje je rejowanska skupina Serbskeho ludoweho ansambla „Łužičanka“, kotraž w Radworju zwučuje, wustupiła. Dalši lokalny matador běchu čłonojo skupiny NOWA DOBA, kotřiž z dźěćimi z Radworskeje gmejny wustupichu.