Prěnje mustwo Sokoła Ralbicy/Hórki hraješe njedawno we wokrjesnej wyšej lize w domjacym stadionje přećiwo mustwu z Němskich Pazlic. Wjac hač 150 přihladowarjow sej snadny duel wobhlada, kiž hosćo na kóncu 1:0 dobychu. Tón abo tamny pak bě sej na tutej njedźeli do Delan dojěł, zo by wukon sudnika posudźował. Tónraz wjedźeše mjenujcy profijowy sudnik partiju.

Richard Hempel z Drježdźan steješe na wonej soboće jako štwórty oficialny sudnik w Dortmundźe před 80 000 přihladowarjemi při liniji, dźeń po tym we wosmej lize na twjerdym hrajnišću Sokoła. Hra běše chětro horca, sudnik Hempel pak měješe wšitko pod kontrolu. To móže tež hrajer Sokoła Stani Šewc wopodstatnić: „Na kóždy pad bě pytnyć, zo steješe profijowy sudnik na hrajnišću. Wón bě přeco w komunikaciji z hrajerjemi, je tež raz pódlanske wěcy narěčał. Je wšitko cyle spěšnje rozsudźił. To bě jara suwereny wukon.“