FC Energija Choćebuz prezentuje so tuchwilu ze špatnej seriju. Po runjewon perfektnej prěnjej połseriji, kotraž je přiwisnikow FCE samo k postupnej euforiji wjedła, je situacija nětkole cyle hinaša. Nimo cila, hrajnu klasu zachować, njeje hižo wjele wot toho zwostało, štož bě spočatnje tak wulkotne. Tutón spad do hłubokeje wukonoweje dźěry dyrbi swoje přičiny měć. Prašenje je, hač wjednistwo mustwa tele přičiny znaje. Je to wašnje hraća, kotrež stajnje zaso k zmylkam wjedźe? Za swoje atraktiwne a zaměrne hrajne wašnje bu nowačk w předkole ze wšěch stron z chwalbami posypany. Nětko hižo žana rěč wo tym njeje.

Wuslědki hrow pokazuja do nawopačneho směra a w škiće jewja so widźomne słabosće. Aktualnje su nadběhowarjo přećiwnika w sprintowych duelach jasnje lěpši. K tomu přidruža so zmylki a bjezstarostnosć. Dale so na hrajnišću pomału agěruje. Přećiwnik ma stajnje dosć chwile so najlěpje pozicioněrować. Na kóncu napadnje při nadběhach, zo wot zapodaćow a flankow z křidłow kaž tež z róžkow jasnje přemało stracha wuchadźa.