Gießen (SN). Wot zwjazkoweho nutřkowneho ministra Thomasa de Maizièra (CDU) připowědźeny integraciski zakoń njebudźe po měnjenju Kurdiskeje wosady w Němskej dosahać, zo hodźeli so aktualne wužadanja zmištrować. Cahit Basar, generalny sekretar kurdiskeje wosady, widźi w njedawno předpołoženym kon­cepće integraciskeho zakonja nutřkowneho ministra hišće tójšto njedostatkow, kaž ze zdźělenki Basara wuchadźa. „Integraciski zakoń móže jenož jedyn bok medalje być. Tamny měł być moderny zakoń wo zapućowanju do Němskeje, kotryž móhł migraciski ćišć na mjezach Němskeje transparentnje a fairnje rjadować“, w lisće rěka. Ći, kotřiž chcedźa do Němskeje přińć, dyrbjeli wědźeć, kotre šansy tule maja, zo móhli so na to nastajić.