1. Budyske tydźenje demokratije so wotměja

Budyšin (SN/CoR). Pod hesłom „Přidaj swoje tři najgroše/Gib deinen Senf dazu“ wotměja so wot 3. septembra hač do 3. oktobra 1. Budyske tydźenje demokratije. „Demokratija je dołho trajacy, druhdy tež ćežki proces. Chcemy wšitkich Budyšanow přeprosyć, so na nim wobdźělić a do rozmołwy přińć“, praji patron zarjadowanja, Budyski wyši měšćanosta Alexander Ahrens (njestronjan), dźens rano na nowinarskej konferency w radnicy. Iniciatorojo su zastupjerjo najwšelakorišich towaršnostnych institucijow, kaž su to Budyske měšćanske zarjadnistwo, Němski dźěłarniski zwjazk (DGB), Budyska ewangelsko-lutherska wosada swjateho Pětra, Kamjentny dom, Domowina, NSLDź, zwjazkarstwo Budyšin wostanje pisany, CDU, SPD, Lěwica, Zwjazk 90/Zeleni, katolska młodźina a dalši.