„Nie zapominamy o Łużyczanach!“ To je prěnja sada lista, kotruž dóstach wot prof. dr. Krzysztofa Radosława Mazurskeho, přećela Serbow z Wrócławja, tydźenjej do jeho smjerće. Je to wotmołwa na naprašowanje, hač by skupinu Serbow po Wrócławju składnostnje pomjenowanja města na lětušu kulturnu stolicu Europy wodźił. Wotmołwa běše po zwučenym wašnju, zo nas wězo rady přewodźa a čaka na termin. Njeje so dočakał, 30. měrca je 69lětny nahle zemrěł.
Wobstajnje a bjez wulkich słowow je njeboćički přećam Serbow wotpowědował. Rady a wěcywustojnje je jich po swojim měsće Wrócławje kaž tež po Delnjej Šleskej a Sudetskej přewodźał. A runje tak rady je njeličomnym zajimcam susodneho słowjanskeho kraja našu domiznu zbližał. Bjez dźiwa – jako geograf a awtor wjacorych domiznowědnych, pućowanskich a turistiskich nastawkow a knihow je swoju wědu ludźom wobšěrnje sposrědkował. Jeho knihu wo geografiji Sudetskeje mjenowachu kritikarjo „bibliju domiznowědnikow“. Politisce je so wón swój čas w dźěłarnistwje Solidarność angažował.
