Powšitkownje kročel Vattenfalla witaja

Berlin/Drježdźany (dpa/K/SN). Po tym zo je z wčerawša wěste, zo přeńdźe brunicowa sparta Vattenfalla do rukow čěskeho koncerna EPH njedadźa reakcije na so čakać.

Sakski premier Stanisław Tilich (CDU) čěske předewzaće namołwi, njemyslić jenož na wunošk. „Cyle rozsudne za mnje je, zo zawěsća so dźěłowe městna a zo přiznaje so nowy mějićel k brunicy tež přichodne lětdźesatki, zdobom pjenjezy rezerwujo za renaturizowanje.“ Nimo toho dyrbja so trěbne procesy přestrukturowanja w přezjednosći z knježerstwomaj Sakskeje a Braniborskeje přewjesć, Tilich dale žada. Sakski hospodarski minister Martin Dulig (SPD) ma změnu za „wažny signal“ za přichod Łužicy. „Wjeselimy so, zo ma z kóncom ćahańcy 7 500 njeposrědnje potrjechenych ludźi we łužiskim rewěrje zaso perspektiwu.“ Po wudawanju hospodarskeho ministerstwa zwoprawdźi so změna wobsydstwa w přichodnych měsacach.