Rada NATO-Ruska po dwěmaj lětomaj so zaso zešła
Brüssel/Moskwa (dpa/K/SN). Po dwěmaj lětomaj mjelčenja je so w belgiskej stolicy dźensa tak mjenowana Rada NATO-Ruska zaso prěni raz zešła. Rozmołwy wjedźechu na runinje wulkopósłancow 28 krajow NATO a Ruskeje.
Po dnjowym porjedźe buchu naležne temy kaž konflikt Ukrainy dla a situacija w Afghanistanje pojednane. Dźěše tohorunja wo wjetšu transparencu při wojerskich manewrach k pomjeńšenju rizikow. NATO tematizowaše tež napjatosće, nastate přewulkeho přibliženja ruskich lětadłow ameriskim wójnskim łódźam, operowacym na Baltiskim morju. Ruska nača ze swojeje strony sylnjenje jednotkow NATO we wuchodnej Europje, štož ma za njewoprawnjene. Wuslědki ze schadźowanja njejsu wuskočili. K wožiwjenju dźěławosće lěta 2002 za budźenje dowěry mjez něhdyšimi konfliktnymi stronami zymneje wójny załoženeje Rady NATO-Ruska bě předewšěm zwjazkowa republika přinošowała. Zwjadnyć dała bě jej NATO 2014, po tym zo bě sej Ruska połkupu Krim zaso přizamknyła a naslědnje proruskich separatistow w Donbasu podpěrała.
