Sakski krajny sejm wo kriminalnej statistice debatował

Drježdźany (SN/MkWj). Statistiske ličby móžeš dospołnje wšelako interpretować, cyle po tym, kak je wobhladuješ. Tole je so na dźensnišim posedźenju Sakskeho krajneho sejma w Drježdźanach cyle jasnje pokazało. Při zahajenju posedźenja witaše prezident sejma Matthias Rößler (CDU) jako hosća maršala Pólskeho sejma Mareka Kuchcińskeho, kiž je tuchwilu na oficialnym wopyće w Němskej.

Zakład aktualneje debaty bě najnowša policajska kriminalna statistika Sakskeje, kotruž nutřkowny minister Markus Ulbig (CDU) njedawno na nowinarskej konferency předstaji. Tam bě Ulbig zwěsćił, zo je cyłkowna kriminalita w swobodnym staće woteběrała a zo je policija wjace njeskutkow wujasnić zamóhła. Zdobom je politisce motiwowana kriminalita widźomnje rozrostła. Wotpowědujo tomu trjeba demokratiski stat sylnu policiju, je facit sakskeho krajneho knježerstwa.