Choćebuz (HA/SN). Znaty, zasłužbny delnjoserbski farar, spisowaćel a Maćicar Herbert Nowak by sobotu, 23. jutrownika, stote narodniny swjećił. We wobłuku hódneho a jara dostojneho zarjadowanja su jeho dźěći a swójbni zhromadnje ze zastupnikami serbskeho a cyrkwinskeho žiwjenja na njeho spominali. Mjez nimi běchu fararka Ulrike Menzel a předsyda Maćicy Serbskeje Jurij Łušćanski. Wopomnjensku narěč při rowje Herberta Nowaka na Choćebuskim Zapadnym kěrchowje­ z něhdźe 40 wobdźělnikami dźeržeše­ serbski dušepastyr Ingolf Kśenka­ z Janšojc. „Chcemy so Herbertej Nowakej­ hišće raz za to dźakować, štož je w lubosći k Bohu a serbskemu ludej napřećo wšitko zdokonjał“, wón potwjerdźi. „Zo móže so dźensa Bože poselstwo w delnjoserbskej rěči rozšěrjeć, je předewšěm jeho zasłužba. Serbska namša, kotraž so po kóncu NDR zaso prawidłownje swjeći, bě jemu najwjetše zbožo.“