Šef serbiskeho knježerstwa Aleksandar Vučić je dočasne parlamentne wólby přeswědčiwje dobył. Jeho Serbiska pokrokowa strona (SNS) docpě po wuličenju nimale wšěch hłosow něhdźe 56 procentow.

Běłohród (dpa/K/SN). SNS wobsadźi tak 145 sydłow z cyłkownje 250 a změje absolutnu wjetšinu. Druhe městno wobsadźi z přibližnje dwanaće procentami Socialististiska strona Serbiskeje (SPS) wonkowneho ministra Ivicy Dačića, z čimž wobsadźi 33 sydłow. Do sejma zaćehnje po lětach tež zaso nacionalistiska Serbiska radikalna strona (SRS) Vojislava Šešelja – za stronu njedawno w Den Haagu z wójnskich złóstnistwow wuwinowaneho politikarja wupraji so bjezmała wosom procentow. Zastupjena budźe w parlamenće tež mjeńša nacionalistiska strona Dveri, kotraž docpě dobrych pjeć procentow a jědnaće sydłow. Wólbne wob­- dźělenje je z něhdźe 56 procentami było trochu wyše hač před lětomaj.