Choćebuz (SN/MkWj). Rada za naležnosće Serbow Braniborskeje je so na swojim wčerawšim wurjadnym posedźenju w Choćebuzu hišće raz wo tym dorozumiła, zo krajnemu knježerstwu próstwy dalšich gmejnow wo pruwowanje přisłušnosće k serbskemu sydlenskemu rumej zapoda. Doba přizjewjenja so runje dźensa kónči. Zakład toho je wobzamknjenje serbskeje rady 24. meje, po kotrymž měli so próstwy zapodać. Prawo zapodaća maja po braniborskim Serbskim zakonju gmejny runje tak kaž serbska rada. Jeje předsyda Torsten Mak so na naprašowanju SN zapřijeću „rozšěrjenje serbskeho sydlenskeho ruma“ wobaraše. „Njeńdźe scyła wo rozšěrjenje, ale jenož wo oficialne připóznaće našeho starodawneho sydlenskeho ruma“ wón zwurazni. Nětko chcedźa so tež z listami na potrjechene gmejny wobroćić. Nimo toho so wo to prócuja, zo so naležnosć na internetnej stronje Braniborskeho krajneho sejma wozjewi.