Unija CDU/CSU wólby zwjazkoweho sejma dobyła – AfD na wuchodźe prědku

Berlin (dpa/SN). Unija CDU/CSU z kanclerskim kandidatom Friedrichom Merzom na čole je wólby zwjazkoweho sejma jasnje dobyła. Předsyda CDU je připowědźił, zo chce nowe zwjazkowe knježerstwo hač k jutram wutworić, dotal pak njeje hišće jasne, z kim. Zwjazkowy kancler Olaf Scholz je poražku swojeje SPD mjeztym přiznał. Strona leži za AfD, kotraž je swój wuslědk podwojiła. Scholz je připowědźił, zo njebudźe w nowym knježerstwje sobu skutkować.

Po dotalnym wuličenju je so unija CDU/CSU na 28,5 procentow polěpšiła (2021: 24,1 procent). Při wšěm je to druhi najšpatniši wuslědk unije. AfD docpěwa 20,8 procentow (10,4 procenty). SPD kanclera Olafa Scholza je dramatisce na najšpatniši wuslědk po 1949 spadnyła a docpěwa runje hišće 16,5 procentow (2021: 25,7 procentow). Zeleni z kanclerskim kandidatom Robertom Habeckom spadnu na 11,6 procentow. Lěwica polěpši so jasnje na 8,7 procentow (4,9). FDP nima z 4,3 procentami ani wjace połojcu hłosow z lěta 2021 (11,4) a njebudźe ­runje tak kaž BSW (4,97 procentow) hižo w zwjazkowym sejmje zastupjena.