100 000 Serbow, sony wo šulstwje a nawrót do Łužicy lětsa w srjedźišću

Budyšin/Drježdźany (SN/mb). Nawjazujo na lońši rjad zarjadowanjow pod samsnym hesłom chcedźa Sakska krajna centrala za politiske kubłanje (SLpB), Serbske Nowiny (SN) a Załožba za serbski lud lětsa ze „serbskej debatu“ pokročować. Prěnje zarjadowanje w kooperaciji ze Serbskim institutom (SI) wotměje so štwórtk, 27. měrca, w 19 hodź. na žurli Budyskeho Serbskeho domu. Debatu wo temje „Noworěčnicy: Wutrobnje witani?! 100 000 Serbow a kak dale?“ budźetej dr. Lubina Malinkowa a dr. Theresa Jacobsowa moderěrować. Jako hosći za diskusiju na podiju a z publikumom stej sej wědomostnikow prof. dr. Nicole Dołowy-Rybińsku a dr. Fabiana Kaulfürsta, fararku dr. Corneliu von Ruthendorf-Przewoski kaž tež Annu-Rosinu Wjeselinu přeprosyłoj, kotrejež puć do Chróšćanskeho serbskeho swěta Grit Lemke w filmje „Pola nas rěka wona Hanka“ dokumentuje.