Kak so derje škitać?
srjeda, 30. nowembera 2016
spisane wot: Serbske Nowiny
Budyšin (SN). Pod hesłom „Kak kriminelna je Sakska? Poručenja k škitej přećiwo zadobywarjam“ wotměje so póndźelu, 5. decembra, we 18 hodź. přichodne čitanje w tuchwilnym semestrje Budyskeje powołanskeje akademije na Lubijskej dróze. Referent wječora je kriminalny hłowny komisar Rolf Kasper ze Zhorjelskeje policajskeje direkcije. Wón porěči wo móžnosćach moderneje zawěs- ćenskeje techniki, kotraž móže wulkemu dźělej pospytanych zadobyćow do bydlenjow zadźěwać. Přizjewjenja za čitanje njejsu trěbne, zastup je darmotny.
Adwentny koncert SLA
wutora, 29. nowembera 2016
spisane wot: Marian Wjeńka
Budyšin. Chór, orchester a solisća Serbskeho ludoweho ansambla skića swojim připosłucharjam móžnosć, hektiskemu dohodownemu časej wućeknyć. Po zwučenym wašnju wopřijima adwentny koncert lětsa tež zaso mjezynarodne twórby a zaklinči hnydom dwójce w adwenće na žurli SLA w Budyšinje. Šarmantna moderatorka Kristina Nerad powjedźe po programje a překwapi tež z tej abo tamnej hodownej stawizničku. Premjera zaklinči štwórtk, 1. decembra, w 19.30 hodź. na žurli SLA. Dalše předstajenje tam budźe 18. decembra w 16 hodź.
Jutře wječor změje kruch „Wir sind keine Barbaren“ premjeru w ...
pjatk, 25. nowembera 2016
spisane wot: Dr. Cordula Ratajczakowa
Jutře wječor změje kruch „Wir sind keine Barbaren“ premjeru w Budyskim NSLDź. Za mandźelstwowu komediju Philippa Löhle, kotraž so ze strachami srjedźneje woršty před ćěkancami rozestaja, je režiser a wyši hrajny nawoda NSLDź Stefan Wolfram wobydlerski chór ze 17 ludźimi zestajił. Foto: Mirosław Nowotny
Wobrazy a hudźba
štwórtk, 24. nowembera 2016
spisane wot: Marian Wjeńka
Berlin. Finisaža wustajeńcy „Fern und nah“, w kotrejž su mjez druhim wobrazy Budyšanki Ulriki Mětškoweje widźeć, je jutře, pjatk, w 20 hodź. w Berlinskej galeriji F92 na Fehrbellinskej 92. Při tej składnosći wotměje so tam komorny koncert z twórbami Jura Mětška, kotrež zanjese orchester Berlinskeje Komiskeje opery.
Rozšěrjena přehladka „Wotmolowane – Mit Licht gemalt“ je ...
pjatk, 18. nowembera 2016
spisane wot: Jürgen Matschie
Rozšěrjena přehladka „Wotmolowane – Mit Licht gemalt“ je nětko w Serbskim muzeju přistupna. Nimo fotow priwatnych požčowarjow je galerija fararjow Klětnjanskeje ewangelskeje cyrkwje widźeć. Rjad wuwědomja, kak je so ateljejowe fotografowanje w běhu lětdźsatkow přeměniło. Na wulkej wobrazowce hodźi so w priwatnych fotowych albumach na přikład Łušćanskec swójby z Njebječic wokoło 1910, młodowučerja Jurja Kubaša-Worklečana abo wo poswjećenju Zejlerjoweho pomnika we Łazu listować. Widźeć je dale dźěl diasoweje serije wo žiwjenju w klóštrje Marijinej hwědźe w 1920tych lětach. Foto: Jürgen Maćij
Reje w bróžni
štwórtk, 17. nowembera 2016
spisane wot: Marian Wjeńka
Ralbicy. Ralbičanski młodźinski klub přeprošuje na kermušne reje, a to jutře, pjatk, wot 21 hodź. do Ralbičanskeje bróžnje. Reje wotměja so lětsa prěni raz pjatk a nic kaž hewak sobotu. Při tačelach budźe DJ Guido stać, zastup płaći tři eura. Bróžeń budźe wutepjena.
Wjac hač 400 škleńcow z priwatneje zběrki Anger w Berlinje a ...
pjatk, 11. nowembera 2016
spisane wot: Axel Arlt
Wjac hač 400 škleńcow z priwatneje zběrki Anger w Berlinje a Kohlschmidt w Choćebuzu je wot wčerawšeho pod hesłom „Design wšědneje potrjeby – škleńca z Njedźichowa“ na Mužakowskim nowym hrodźe widźeć. Přihotowali su pokazku sobudźěłaćerjo hrodu wokoło Reneja Nitschki. Wona je hač do kónca decembra přistupna. Foto: Joachim Rehle
We wobłuku Budyskich komornych koncertow móža zajimcy jutře, 5. ...
pjatk, 04. nowembera 2016
spisane wot: Marian Wjeńka
We wobłuku Budyskich komornych koncertow móža zajimcy jutře, 5. nowembra, w 19.30 hodź. w Budyskim Serbskim muzeju Ingeniumowy ansambl ze Słowjenskeje dožiwić. Šěsć młodych wuměłcow z Ljubljany budźe tam a cappella spěwać. Zastupne lisćiki za 16 eurow (potuńšene 13 eurow) změja při wječornej kasy. Foto: PR/Ingenium
Je zaso tak daloko: Kaž kóžde lěto mamy časniki kónc oktobra ...
pjatk, 28. oktobera 2016
spisane wot: Serbske Nowiny
Je zaso tak daloko: Kaž kóžde lěto mamy časniki kónc oktobra přestajić, wšako skónči so lětni čas. Tónraz budźe to zajutřišim, 30. oktobra, a to zdypkom w třoch. Potom dyrbimy pokazowaki wo hodźinu wróćo zwjertnyć. We wšěch digitalnych časnikach pak so čas wotsamo přestaji. Chróšćanski časnikarski mišter Jürgen Njek hišće na to skedźbnja, zo njeměli so časniki z machawku abo z wotbiwanjom wróćo wjerćeć, ale radšo zastajić a nowy dźeń w prawym času zaso startować. Foto: SN/Maćij Bulank
Spominać a dale myslić
štwórtk, 27. oktobera 2016
spisane wot: Serbske Nowiny
Chrósćicy (SN). Serbski zapósłanc Lěwicy w Sakskim krajnym sejmje Hajko Kozel přeprošuje jutře, pjatk, w 14 hodź. do foyera Serbskeje zakładneje šule „Jurij Chěžka“ w Chrósćicach, na zarjadowanje k spominanju na 15. róčnicu Chróšćanskeho zběžka pod hesłom „Spominać a dale myslić“. Diskutować chcedźa tam tež wo impulsach Chróšćan zběžka, kotrež skutkuja přez hranicy Sakskeje a šulskeje politiki.
Spočatnje porěči Hajko Kozel wo šulskopolitiskich wužadanjach w Serbach. Kubłanskopolitiska rěčnica frakcije Lěwicy Cornelia Falken analyzuje a wuhódnoći Chróšćan zběžk jako wotmołwu Serbow na pospyt politiki, serbsku šulsku syć rozpušćić. Předsyda Domowiny Dawid Statnik rozłoži žadanja za nowelu sakskeho šulskeho zakonja nastupajo serbsku šulsku syć. A čěski zapósłanc Europskeho parlamenta Jaromír Kohlíček pokaza, kak móhło so problemej pobrachowacych serbskich wučerjow z pomocu Pólskeje a Čěskeje wotpomhać. Něhdźe wot 16 hodź. budźe połdra hodźiny chwile za wosobinske rozmołwy při kofeju a tykancu. Zajimcy su wutrobnje witani.
