Smječkecy. Domowina přeproša na dźěłarničku „#lětaki a #nalěpki quick and crazy“, kotraž wotměje so 15. a 22. apryla wot 17 do 21 hodź. w Smječkečanskim młodźinskim klubje. Pod nawodom Michała Cyža móža młodostni a dalši zajimcy z programom Photoshop lětak sami­ zestajeć a know how na tutym polu powjetšić abo skrućić. Ličaki steja k dispoziciji. Přizjewjenje za krótko rozsudźenych je hač do pjatka hišće móžne pola kubłanskeje referentki Rejzki Wałdźic pod: .

Miłoćicy. Křesćansko-socialny kubłanski skutk přewjedźe přichodne měsacy zaso projektowe dny za šulerjow w zežiwjenskim a zelowym centrumje klóštra Marijineje hwězdy. Nimo wupruwowanych temow kaž „Wot zorna ke chlěbej“ su nowe, wučbnym planam šulow wotpowědowace poskitki do programa přiwzali. Tak su za wyše šule a gymnazije temu „Jědź za přichod – wuwaženosć na talerju“ koncipowali. Šulerjo zhonja, kak so wuběr žiwidłow na wobswět, strowotu a towaršnosć wuskutkuje. Projekty přewjedu w klóštrje Marijinej hwězdźe runje tak kaž na Wojerowskej Dźěćacej a młodźinskej farmje. Dalše informacije pod www.ekz-marienstern.de.