Budyšin (SN/bn). Pod hesłom „Ahoi! Tim travelling around the world“ je Budyšan Tim Döke wčera w Kamjentnym domje wo swojej 18 měsacow trajacej jězbje po swěće přednošował. Kaž něhdźe 70 zajimcam referat zahajiwši přeradźi, bě „žedźba za nowymi nazhonjenjemi“ z hłownej motiwaciju, „prěni raz sam tak dołho domiznu wopušćić“. Pućowanje započa čłon dorostoweho serwisoweho kluba Leo a sobustaw towarstwa Witajće do Budyšina w awgusće 2022 na křižowanskej łódźi, hdźež bě jako sobudźěłaćer wotrjada za personal naposledk za naležnosće dohromady 1 400 ludźi wopřijimaceho mjezynarodneho mustwa zamołwity. Z pomocu fotografijow a widejowych klipow poda wón mjez druhim „dohlad do wobłukow, kotrež su pasažěram njepřistupne“ a dekonstruowaše mytos romantiskeho namórnistwa: „Na łódźi knježi kruta disciplina, změna traje často dwanaće hodźinow, dźěłaš sydom dnjow wob tydźeń a spiš w móličkej kabinje bjez wokna.“ We wólnym času pak spřećeli so z wjacorymi kolegami, kotrychž pozdźišo pućujcy jeničce z „lochkim wačokom“ w jich domiznach wopyta.