Nimale kóždy dźeń. Nimale kóždy dźeń zemrěje žona w Němskej, dokelž je žona. Femicid so tute njeskutki mjenuja. W lěće 2023 přisadźi tak 360 holcow a žonow bjez winy swoje žiwjenje. W štyrjoch z pjeć padow bě skućićel aktualny abo něhdyši partner žony respektiwnje holcy.

Nimale kóždy dźeń w Němskej žona abo holca wudycha, dokelž njeje so jako muž narodźiła. Ličby su skandal. Wjetši skandal pak je, zo tča za ličbami maćerje, dźowki, sotry, ćety, wowki. Je lochko so za ličbami chować, ale pomyslće sej, zo zemrěje Waša sotra, dokelž jej zawistny eks-partner noweho přećela njepopřeje. Abo zo přisadźi Waša ćeta žiwjenje, po tym zo bě ju mandźelski lěta dołho doma znjewužiwał. Wjace hač 70 procentow woporow namocy w domjacnosći su mjenujcy žony a holcy. A haj, mandźelski móže swoju žonu tež doma wumocować – splažny wobchad je mjenujcy stajnje na konsens wjazany.