Budissa Budyšin woswjeći sobotu, 21. decembra, swoje 120lětne wobstaće, a to z wosebitym sportowym zarjadowanjom. W sportowej hali na Budyskim Třělnišću přewjedu 1. tradiciski turněr Budissy. Něhdyši a nětčiši hrajerjo nastupja wot 17 hodź. přećiwo sebi. Koparske cyłki wobsteja z hrajerjow, kotřiž su abo běchu wusko ze swojimi towarstwami zwjazani. Zaměr tradiciskeho turněra je, wožiwjenje historiskeje zwjazanosće mjez Budissu Budyšin a dalšimi regionalnymi tradiciskimi towarstwami. Při tym nima turněr jenož charakter sportoweho wubědźowanja, ale předewšěm rum za wuměnu něhdyšich akterow a wozrodźenje dopomnjenkow skićić. Za kóžde mustwo pomjenowa so hrajer jako kapitan, kiž bě za Budissu aktiwny. Zastup za turněr njehromadźa.

Wobdźělene cyłki: Biskopičanske KT, Serbska koparska wubranka, FC Hornja Łužica Neugersdorf, Wojerowski FC, Budissa Budyšin, Jendota Kamjenc a Póst Germania Budyšin. Jurij Bjeńš

Starbulls Rosenheim –

Łužiske lodohokejowe liški 5:2

(2:1, 3:1, 0:0)

Běłowodźenjo po­dachu so na dołhu jězbu do Rosenheima. Ville Järwelainen, kiž w předsezonje hišće trikot Liškow nošeše, trjechi zahe 1:0. Fina dźeržeše bičk do přihrawki Tobiasa Becka a wodźeše tačel z tym wušiknje mjez nohomaj Anthony Morrone do wrotow (4.). Hosćo reagowachu a přinjesechu po tym wjace kontrole do hry a wurunachu přez wotfalšowanu třělwu Mateja Ledena njedźeržomnje k 1:1 (10.). Poł mjeńšiny do prěnjeje přestawki pak smědźachu so potom Rosenheimscy fanojo hišće raz wjeselić. Z hrajerjom wjac na lodźe třěli Lukas Laub puk wot boka do wrotoweho ruma, wot Morronoweje nohi wotskoči hrajny nastroj najprjedy na smykače Jeremyja Beaudryja a wottam přez wrotowu liniju (20.).

Tež w druhej třećinje běchu wobhladanja hódne hrajne sceny skerje rědke. W 25. min. přesadźi so Zack Dybowski ze spěšnym nastupom přećiwo Clarke Breitkreuzej a zapali tačel wótrje před wrota Liškow, hdźež přetwori Travis Ewanyk z krótkeje distancy k 3:1.

ST Kupoj-Nowa Łuka –

ST Viktoria Worklecy 0:3

(15:25, 16:25, 25:27)

Jasnišo njebychu předznamjenja do tutoho hrajneho dnja sakskeje klasy stafla wuchod lědma być móhli. ST Kupoj-Nowa Łuka, dotal bjez jeničkeho dypka, pohosći w sportowni Wojerowskeho Lessingoweho gymnazija wolejbulistow z Pirny a z Worklec.

Druhi tabulki z Łobjoweho doła wotpowědowaše w prěnjej hrě dnja swojej róli faworita a doby 0:3. Tež Worklečenjo startowachu jako jasny faworit do hry a běchu jara koncentrowani. Dwě seriji solidnych nadaćow pokazaštaj spěšnje na dobyće. Dospołnje přežadani domjacy prošachu při stawje 2:13 wo timeout, njemóžachu pak tež po tym hru zwjertnyć. Viktorianorojo wostachu stabilni a wuhrawachu nadběhi bjez zmylkow. Sadźbowy wuslědk 25:15 dokumentuje přewahu hosći.

Dynamo Drježdźany –

Waldhof Mannheim 2:1 (1:0)

Zestawa Dynama Drježdźany: Schreiber – Risch (66. Heise), Kubatta, Boeder, Sterner, Casar (66. Menzel), Šapina, N. Hauptmann (88. Bünning), Oehmichen (82. Meißner), Daferner (82. Kutschke), Lemmer

Zestawa Waldhof Mannheim: Bartels – Voelcke, Karbstein, M. Seegert (73. Yigit), Klünter, Rieckmann, Thalhammer (85. Arase), Benatelli (85. Kobylanski), Sietan (73. K. Okpalla), Abifade, Shipnoski (72. T. Boyd)