Štwórćfinale na swětowym mišterstwje kopańcy žonow je kompletne. Někotre faworizowane cyłki na dobyće mišterstwa su hišće pódla, někotre su hižo dompuć nastupili. Dopóznaće při tym: Faworića móža na tutym swětowym mišterstwje tola hišće dobyć, a to tež suwerenje. Wot k.o.-koła pokazuje so na turněrje, štó je woprawdźe w dobrej ­formje a ma šansu na titul. Španiska, Francoska, Japanska a Awstralska su to w swojich wosmifinalnych hrach skutkownje dopokazali. Nižozemjanki mějachu nuzu, su swoju partiju pak w stilu dobreho mustwa dobyli. Šwedska a Jendźelska trjebaštej wulku porciju zboža w třělenju jědnatkow, Kolumbiska je překwapjacy hósć w štwórćfinalu. Z Japanskej je jenož hišće jedne mustwo mjez najlěpšimi wosom pódla, kotrež bě hižo raz swětowy mišter. W lěće 2011 dobychu Azičanki titul w Němskej. Wosmifinale WM pak je tež cyle jasnje pokazało, zo je wulki čas USA nimo. Jenički prawy WM-faworit być, njedosaha wjac, zo by dobył. Něhdyše hwězdy-koparki su poněčim swoju karjeru zakónčili, młodym US-koparkam faluje kwalita.