Štwórty lětuši wolejbulowy turněr serbskich wólnočasnych mustwow skónči so w sportowni SŠZC Budyšin z dobyćom cyłka ST 1922 Radwor před Viktoriju Worklecy a šulerjemi Serbskeho gymnazija Budyšin (SGB).

Po „Jutrownym turněrje“ w Ralbicach dojědźe sej wosom mustwow do sportownje Serbskeho šulskeho a zetkawanskeho centruma (SŠZC) Budyšin, zo bychu wuhrali dobyćerja 12. nalětneho turněra wo pokal Spěchowanskeho towarstwa SGB. Bě to mjeztym štwórta stacija serije „top-sydom“, hdźež na kóncu štwórty raz zasobu sportowče a sportowcy z Radworja juskachu.