Les Ladines –

Serbske mustwo žonow 1:2 (1:1)

Zestawa Serbskeho mustwa žonow: Vanessa Peschel – Vianneya Paškec, Sophie Matješkec, Laura Hanušojc, Marta Handrikec (73. Stella Pilcec), Johanna Wjeselic, Lavinia Frenclec, Ulrika Lobedźina, Thea Kuntzec (51. Leoni Wenclec), Vivien Sophie Fišerojc, Lena Handrikec

Druhi hrajny dźeń startowaše z rańšim sportom. Po snědani podachu so koparki do danskeho Grænsehallerne, hdźež lochki trening přewjedźechu. Na druhu hru předkoła dojědźechu sej Serbowki do bliskeho Harrisleeva. Tam nastupichu napřećo Ladinčankam. Tež hdyž ma mustwo Ladinčankow přirunajo ze zašłym razom nowu zestawu, je tam dosć nazhonjenych hrajerkow pódla, kotrež hraja na přikład pola FC Südtirol abo Val Badia we wyšej lize. Mały kruh koparkow hraje samo w Seriji C, štož je 3. najwyša liga w Italskej. Z tym čakaše znowa sylny přećiwnik na žony serbskeho mustwa.