Awtor dźensa

Beno Šołta

Lěto je nimale nimo. Jenički dźeń nam zwostanje, potom móžemy so do noweho měrić. Poslednje „widźał, słyšał, napisał“ 2024 mam w horšći, kajka to česć. Hačrunjež njejsym wulki fan toho, wróćo zhladować na to, što sy wšitko – na sportowym polu – docpěł. Wšako kóždy sportowc wě, zo nimaš so nad docpětym wotpočnyć, ale dale dźěłać na tym, štož je hišće móžno. Što ći dobry čas při poslednim běhu přinjese, hdyž nětko wjace njezamóžeš tutón docpěć, dokelž njejsy wjac dosć trenował?

Wo tym móžu štučku spěwać. Sym to hižo někotre razy sam dožiwił, kak so w běhu lěta tak pohubjeńšich, jenož dokelž sej myslach, zo to nětko móžu a fit wostanu. Jenož z disciplinu a wutrajnosću wjele docpěješ – hustohdy wjace hač sej přicpěješ. Tež to je znate: rozsudźiš so za sport, při kotrymž maš spočatnje ćeže – po wěstym času so potom dźiwaš kak derje sport hižo wobknježiš.