Trochu starši fanojo FC Energije Choćebuz dopominaja so hišće na čas, w kotrymž hibaše so FCE w top-ligomaj němskeje kopańcy. Ze zestupom do 3. zwjazkoweje ligi před dźesać lětami dožiwichu ćežku fazu, kotraž wjedźeše jich hač do nižinow regionalneje ligi. Po wjacorych lětach w tutej bě zazběh z poražku 0:2 přećiwo mustwu z Erfurta do lěta 2024 wjac hač njezbožowny. Postup do 3. ligi bě mjenujcy zwjazany z prěnim městnom hrajneje tabulki.

Tola trenar Wollitz měješe njewšědnu ideju, jako přeprosy swojich hrajerjow na telewizijny wječor. Njepohladachu pak kaž zwučene „Tatort“, Pele Wollitz měješe swójski film. Tutón pokaza wšě zmylki a słabosće hry přećiwo Čerwjeno-běłym Erfurt. Tuta ideja bě dobra za sezonu, w kotrejž sej FCE kusk po kusku načolnu poziciju wuwojowa. Tak hraješe mustwo 19. meje, na zakónčacym hrajnym dnju ligi, w Berlinskim Jahnowym stadionje. Wot tam nawróći so samo z dobyćom 2:0 do třećeje ligi. Na wonym dnju běchu w stadionje tež tójšto serbskich fanow FC Energije (Serbske Nowiny rozprawjachu).