Lipsk (B/SN). Ze swojej hru „Anders, als du glaubst“ wo židach, muslimach, křesćanach a wo roztorhanym swěće předstaji so 29. meje w 19.30 hodź. Berlinska skupina Companie w Lipšćanskej Lutherowej cyrkwi. Přinošk k dialogej nabožinow měri so wosebje na młodostnych. Po předstajenju chcedźa so zastupjerjo wšelakich wěrywuznaćow kaž tež politikarjo z publikumom rozmołwjeć.
Přećiwo eksportej bróni
Bremen (B/SN). Składnostnje 70. róčnicy kónca wójny je cyrkwinski społnomócnjeny za prašenja měra Renke Brahms namołwjał, spjećować so eksportej bróni a wojerskemu rozrisanju konfliktow. „Wšitke nazhonjenja runje minjenych sto lět stawiznow nam pokazuja, zo namóc přećiwnu namóc wuskutkuje“, warnowaše społnomócnjeny za prašenja měra Ewangelskeje cyrkwje w Němskej na wopomnjenskej Božej słužbje w Bremenje. „Namóc a wójna eskalěrujetej we wěčnym čertowym kruhu, hdyž so brónje do wšeho swěta předawaja a so při rozdźělenju hižo kontrolować njehodźa.“ Tež tam, hdźež so z najlěpšim wotpohladom škit ludźi zaruča, su wuspěchi jeno skromne, rjekny nawjedowacy teologa z Bremena.
Plahowar nukli w durinskim Saalfeldźe změje přichodnje snano tójšto dorosta. Něhdźe 150 jeho nukli skakaše po jeho zahrodźe, po tym zo běchu njeznaći pukloty zwočinjeli. Kaž policija zdźěli, je 43lětny wobsedźer swoje zwěrjata sam zaso łójił a do puklotow stykał. Dokelž wón nukle hewak po splahu dźělene dźerži, je lochce móžno, zo wone jemu po wjacorych hodźinach na swobodźe bórze bohaty dorost wobradźa.
Samopaslena atrapa bomby za dźěćace narodniny je so w Dortmundźe wo zasadźenje policije postarała. Pěšcy nańdźechu blisko kazina tobołu z podhladnym wobsahom. Policija wokolinu zašlaha a skaza rumowarjow bombow. Młoda žona so přizjewi a situaciju rozjasni. Wona bě atrapu spasliła a w tobole schowała a nalěpk „dźěćace narodniny“ na nju zlěpiła. Policiji wšak za swjećenjom njebě.
Nowa marka za festiwale
Lubin (dpa/SN/ch). Města Lubnjow, Łukow a Lubin chcedźa swoje wuměłstwowe festiwale přichodnje zhromadnje zwičnjeć. „Wuwili smy za to marku Wuměłstwowy rum Błóta“, wobkruća Anika Schäfer, nawodnica projekta za kulturne spěchowanje we wokrjesu Dubja-Błóta. Nowa marka ma efektiwniše a naročniše wabjenje podpěrać. Lubin zarjaduje prawidłownje festiwal Aquamediale. W Lubnjowje přewjeduja Błótowski ateljej a we Łukowje Spektralu. Prěnju zhromadnu wabjensku akciju planuja spočatk junija w Berlinje.
Stawk rozšěrjeny
Podstupim/Choćebuz (SN/JK). Za lěto 2019 planowana wokrjesna reforma w Braniborskej wubudźa hižo nětko horce diskusije. Wšelake namjety za nowu strukturu w Braniborskej wjedu ke kontowersam tež w jednotliwych stronach. Po prěnich namjetach knježerstwa měli města Choćebuz, Frankfurt nad Wódru a Brandenburg zhubić status bjezwokrjesnosće. Nowe wokrjesy měli so rjadować centralnje wokoło Berlina, štož pječa lěpšu zarjadnisku komunikaciju zaruča. Wosebitosć by był nowy wokrjes wokoło Choćebuza. W nim by sydlenski rum Serbow w jednym wokrjesu zjednoćeny był. Tuchwilu je sydlenski rum Serbow w Braniborskej hišće na tři wokrjesy rozdźěleny. Planowana struktura móhła so hladajo na serbske prašenja pozitiwnje wuskutkować. Za tajki rozsud móhła wotpowědna reakcija zamołwitych za serbske naležnosće w Braniborskej, ale tež w Domowinje doskónčny rozsud na dobro Serbow wobwliwować.
Přichodne struktury njejsu hišće rozsudźene, ale wjace hač dźesać wokrjesow Braniborska w přichodźe njezměje.
Zhorjelc (SN). Hnydom štyrjo požadarjo z Hornjeje Łužicy su docpěli druhe koło zwjazkoweho syćoweho programa „Angažowane město“.
Z cyłkownje 272 požadanjow postajichu jurorojo 55 předewzaćow, mjez druhim Budyski Kamjentny dom, towarstwo Sony za žiwjenje w Habrachćicach-Neugersdorfje, Zhorjelske towarstwo Zhorjelc za swójbu a Socialnu syć Łužica w Běłej Wodźe.
Hač do kónca julija maja wuzwoleni chwile swoje koncepty dale wuwiwać. Za to dóstanu hač do 2 000 eurow a fachowu podpěru programowych partnerow. Kónc awgusta projekty za spěchowansku dobu wuzwola. Te so potom tři lěta z hač do 50 000 eurami na stejnišćo spěchuja. Zaměr programa je sylnić čestnohamtske dźěło w komunach a njepodpěrać jednotliwe projekty, ale spěchować kooperaciju organizacijow, iniciatiwow a komunow. Program spěchuja z třomi milionami eurow Herberta Quandtowa załožba BMW, Roberta Boschowa załožba, Generali-fonds přichoda kaž tež zwjazkowe ministerstwo za swójby, seniorow, žony a młodźinu a dalši.
Waršawa (dpa/SN/K). Konserwatiwny opozicionelny politikar Andrzej Duda je wólby prezidenta w Pólskej dobył. Dźensa wozjewjeny kónčny wuslědk wupokazuje, zo dósta 43lětny Duda 51,5 procentow. Za dotalneho prezidenta Bronisława Komorowskeho wuprajichu so 48,4 procenty. Kaž Duda zdźěli, wustupi wón ze strony Prawo a sprawnosć, kotraž bě jeho nastajiła, dokelž chce „prezident wšěch Polakow być“.