Berlin (dpa/SN). Tójšto ludźi w Europje zhladuje tuchwilu po najnowšim woprašowanju pesimistisce na wuhlady Ukrainy při zakitowanju kraja přećiwo ruskej nadpadniskej wójnje. Jenož dźesać procentow wot europskeho instituta ECFR woprašanych wěri do dobyća Ukrainy, kaž wčera w Berlinje zdźělichu. Dwójce telko ludźi wěri do dobyća Ruskeje. Najwjetša skupina, mjenujcy 37 procentow do toho wěri, zo wójnu hakle přez diplomatiske jednanja skónča. W tym padźe by Ukraina wulki dźěl swojeho teritorija přisadźiła. Wokomiknje je Ruska něhdźe pjećinu Ukrainy wobsadźiła a je wjacore kónčiny přećiwo ludowemu prawu do swojeho teritorija zarjadowała. Při wšěm je 41 procentow ludźi měnjenja, zo njesměł nichtó Ukrainu k jednanjam z Ruskej nuzować. Za naprašowanje běchu so spočatk januara wjace hač 17 000 ludźi w dwanaće europskich krajach prašeli, mjez druhim w Němskej, Francoskej, Pólskej a Šwedskej. Ukraina dyrbi so mjeztym dwě lěće ruskemu nadpadej wobarać. Wojerske połoženje na fronće je chětro wobćežne, pomoc zapada z najwšelakorišimi brónjemi je wosłabnyła.

New Delhi (dpa/SN). W Indiskej je so konflikt mjez protestowacymi ratarjemi a wěstotnymi mocami dale přiwótřił. Dźesaćitysacy burow su wčera na wuslědk dalšeje rozmołwy mjez nawodnikami demonstrantow a indiskim knježerstwom čakali. Burja žadaja sej garantowane płaćizny za swoje wudźěłki a wjace pjenježneje podpěry.

Ratarjo čakachu po informacijach medijow při barikadach betonowych blokow, železnych elementow a druhich ­wěcow, z kotrymiž běchu woni dróhi do směra na indisku stolicu New Delhi zaraćili. Ratarjo mějachu bagry, měchi pěska, rukajcy a nahubniki sobu. Wěstotne ­mocy běchu z elektriskimi šokowymi nastrojemi, sylzopłunom a maskami wuhotowane. Pječa su z trutami sylzopłun na demonstrantow mjetali. Protestowy pochod na New Delhi běchu ratarjo hižo minjeny tydźeń zahajili. Policisća běchu jón stajnje zaso ze sylzopłunom zadźerželi. Po wjacorych njewuspěšnych rozmołwach ze zastupnikami knježerstwa běchu ratarjo rozsudźili, zo z maršom do stolicy pokročuja. Protest wotměje so ­něšto měsacow do wólbow parlamenta.

Priwatny stawk šofera nakładneho awta na parkowanišću je zasadźenje policije zawinował. Předewzaćel wozydłownistwa bě policiju wo pjanym šoferu na parkowanišću w Ottendorfje-Okrilli informował. Zastojnicy nadeńdźechu woprawdźe 52lětneho pólskeho šofera, kiž měješe wjace hač dwě promile alkohola. Jěć pak wón nochcyše, dokelž swojeho šefa dla stawkowaše, kaž sam rjekny.

Sta litrow piwa na dróze a hromady črjopow: Nakładne awto je wčera po puću na awtodróhu 70 w hornjofrankskim Kulmbachskim wokrjesu sta piwowych kašćikow zhubiło. Rumowanje traješe po informacijach policije wjacore hodźiny. Palety piwa běchu so w křiwicy suwać započeli, přełamachu wobhrodźenje připowěšaka a padnychu na dróhu. Kontrola wunjese, zo njebě piwo porjadne přiwjazane. Škoda wučinja 35 000 eurow.

Budyšin/Drježdźany (SN/MiP). Składnostnje dźensnišeho Mjezynarodneho dnja maćeršćiny je Cordula Ratajczakowa projekt za rewitalizaciju serbšćiny - ZARI, w kotrymž jako wědomostna wjednica dźěła, w Sakskich nowinach (SZ) předstajiła. Nimo wažneho dźěła rěčnych motiwatorow je tež na wědomostne dźěło w projekće a z toho wuchadźace dopó­znaća skedźbniła. Dźěło na „rěčnych biografijach“ wukristalizuje na přikład přičiny za wšelakore nastajenje ludźi k serbšćinje w dwurěčnych kónčinach. „Z wulkej wěstosću móžemy prajić, zo ma kóždy Łužičan znajmjeńša jednoho w swojej swójbje, kotryž je serbsce rěčał“, praji Ratajčakowa. Projekt ZARI widźi w tutym fakće šansu, rěč dźěda abo wowki mjez ludźimi zaso wožiwić.