Łužiske lodohokejowe liški –

Lodowi piraća Crimmitschau 3:4 p.tř.p. (1:1, 1:1, 1:1, 0:1)

Po Lodowych lawach sćěhowachu Lodowi piraća. Druhi raz w běhu tydźenja hrajachu Łužiske liški sakski derby w DEL2.

Hosćo wukonjachu wot wšeho spočatka wjele ćišća a wužichu zahe swoje šansy z hrajerjom wjac na lodźe. Něhdyša liška Thomas Reichel docpě w 5. min. 1:0 a z tym nawjedowanje za Lodowych piratow. Tola Liški dale suwerenje wo wrota wojowachu. Po wjacorych dobrych šansach trjechichu wurunanje krótko do přestawki. Tom Knobloch přihra puk Lewisej Zertera-Gossage, kotryž docpě 1:1.

Po 73 sekundach w druhej třećinje běchu Lodowi piraća znowa wuspěšni. Scott Feser trjechi druhe wrota 2:1. Tola Liški njezamyleni dale sylnje zakitowachu a spytachu wurunanje docpěć. Tola druhe wrota, najebać jara dobrych móžnosćow, najprjedy raz njetrjechichu. Potom bě to Alexander Dosch, kiž we 38. min. ze zajimawej akciju wuruna 2:2.

SJ Chrósćicy –

FV Ottendorf-Okrilla 2:1 (0:0)

Zestawa domjacych: Škoda – Rätze (88. Bjeńš), B. Cyž, Zynda, Mark, L. Zahrodnik (81. Donat), Hawš (56. Matik), M. Zahrodnik, Bogusz, G. Zahrodnik, Młynk (56. Handrik)

Prěnju adwentnu njedźelu witachu Chróšćenjo koparjow z Ottendorfa-Okrille do Chrós­ćic. Hačrunjež su hosćo w delnim dźělu tabulki zaměstnjeni, mjerzachu lětsa hižo toho abo tamneho fawo­rita. Tuž běchu domjacy hrajerjo war­nowani.

Wot spočatka wzachu Chróšćenjo ceptar do ruki a hru postajowachu. Prěnje móžnosće wuhrachu sej po wólnych kopach. Hłójčkowanej bulej Michała Młynka a Bosćija Cyža pak wrotar wotwobara. Tež dalša šansa Młynka po flance padny jenož na pobóčny sak. Na druhej stronje zamóžachu hosćo přeco zaso konterować. Jedyn tajki strašny bul dyrbješe Jakub­ Škoda wotwobarać, dalši třěl prasny na łatu. Kónc prěnjeho połčasa wuhrachu sej hosćićeljo hišće trójce šansu na wrota. Tola Jan Bogusz, Maksimilian Zahrodnik abo Młynk bul we wrotach njezaměstnichu, wšako hosćo jich třěle stajnje derje blokowachu. Tak podachu so wobaj cyłkaj bjez wrotow do pře­stawki.

Šesty wólnočasny wolejbulowy turněr serije „top-sydom“ w Radworju dobychu prěni raz hrajerki a hrajerjo mustwa Sokoła Ralbicy/Hórki před Budyskim Serbskim gymnazijom a Sportowej jednotku Chrósćicy.

Po lěćnej přestawce dojědźe sej sydom wólnočasnych zastupnistwow do Radworja, zo bychu w tamnišej sportowni „Slavija“ dobyćerja při wysokim saku zwěsćili. Hłowny organizator wječora Syman Hrjehor wjeseleše so při wotewrjenju hnydom dwójce. Sprěnja běchu wšitke cyłki tuteje serije přitomne a zdruha bě podźěl wolejbulistkow z třinaće hrajerkami znowa wysoki.

Po dwuhodźinskim boju, w kotrymž hraješe kóždy přećiwo kóždemu stajnje 10 mjeńšinow, wudobychu sej Kulowscy sportowcy z jednym dobyćom sedme městno. Tež wólnočasni wolejbulisća Viktorije Worklecy jenož jónu dobychu, mějachu pak při wuličenju małkich dypkow 16 minusowych mjenje hač Žołto-módri Kulow. Kompliment do Worklec, wšako startowachu tónraz samo ze štyrjomi hrajerkami.

W basketbulowej krajnej lize bě so sobotu wječor hornjołužiski derby přewjedł. Nimo mnohich přihladowarjow z Budyšina pućowaše tež 60 fanow ze Zhorjelca do sportoweje hale při Třělnišću. Hosćo mějachu hišće mału zličbowanku wotewrjenu. Na spočatku sezony běchu Budyšenjo w Zhorjelcu z hosćom a dojědźechu z jasnym 75:101-dobyćom a spěwacymi fanami w busu domoj. Hač do połčasa mějachu we wróćohrě wšitcy zaćišć, zo dawa wospjetowanje tutoho suwereneho wukona Budyšanow (połčasowy staw 45:22). Tola w druhej połojcy mobilizowachu Squirrels Zhorjelc wšitke rezerwy. Tak bu hra kaž tak husto hišće napjata. W hali nasta gigantiska nalada. Na kóncu pak běchu to zaso fanojo w módro-žołtych barbach města Budyšin, kiž swjećachu zasłužene dobyće 74:67. Foto: Jörg Stephan