Kónčny medaljowy špihel 24. olympiskich zymskich hrow:

   z s b

1. Norwegska  16 8 13

2. Němska  12 10 5

3. China   9 4 2

4. USA    8 10 7

5. Šwedska   8 8 5

Peking (JBo/SN). Ze swjatočnej ceremoniju su so wčera 24. olympiske zymske hry w Pekingu zakónčili. Za to pokazachu dobyćerjo a dobyćerki krasnosmykanja wosebitu galu. Na to slědowaštej hudźbne a rejwanske předstajenje kaž tež parada olympionikow a olympionikowkow jednotliwych krajow.

Lětuše hry stejachu mjez druhim ranjenja čłowjeskich prawow a wobswětoškitnych njedostatkow dla we wulkej kritice. Přidatne wužadanje zwisowaše z koronapandemiju. Tak njemóžachu so někotři atleća a někotre atletki na wubědźowanjach wobdźělić a dyrbjachu w karantenowych kwartěrach přebywać. Tež doping njeje lětuše wulkozarjadowanje přelutował. Najdwělomniši pad po-trjechi 15lětnu krasnosmykarku Kamilu Walijewu, zdobom najmłódšu atletku w Pekingu.

Wo olympiskich hrach móže kóždy myslić, štož sam chce. Wosebje hry w Pekingu, kotrež běchu za němske mustwo jara wuspěšne, su k rozdźělnym a kontrowersnym diskusijam wjedli. Chětro přesłapjace w tym zwisku bě a je skutkowanje němskeho prezidenta olympiskeho komiteja dr. Thomasa Bacha. Sport a politika njehodźitej so bohužel wjace dźělić. Wuwiće drje njeje nowe, dósta pak z hrami w Chinje nowu dimensiju a kwalitu. Sportowcam su olympiske hry nimo swětowych mišterstwow najwuznamniše wubědźowanje w běhu karjery a tak zdobom wjeršk. Olympiski duch pak njeje so tónraz tak wuwił, kaž smy to zdźěla zwučeni. Najwjace wubědźowanskich městnow su cyle nowe natwarili, a dalše wužiwanje po olympiskich hrach je dospołnje njewěste. Dajmy so překwapić, w kotrym stawje olympiske wubědźowanske městna w přichodźe wuhladamy. Wosobinsce wjeselu so hižo nětko na přichodnu zymsku olympiadu 2026 w italskej metropoli Mailand a městačku Cortina d’Ampezzo w Dolomitach.

Medaljowy špihel

Staw po 97 ze 109 rozsudow:

   z s b

1. Norwegska  15 8 11

2. Němska  10 7 5

3. USA    8 8 5

4. China   8 4 2

5. Nižozemska   7 5 4

5. Šwedska   7 5 4

7. Šwicarska   7 2 5

8. Awstriska   6 7 4

9. Ruski OC   5 9 13

10. Francoska   5 7 2

Peking (JBo/SN). Nordiscy kombiněrarjo Manuel Faißt, Julian Schmid, Eric Frenzel a Vinzenz Geiger zamóchu sej wčera dalšu slě­bornu medalju za Němsku wuwojować. Wulki podźěl na tym měješe Geiger, kiž bě z fulminantnym kónčnym běhom konkurencu přesćahnył. Jeničce Jörgen Graabak, zastupjer norwegskeje zestawy, docpě z wulkim předskokom 54,90 sekundow před nim cil. Bronzu wubědźichu sej Japančenjo.

Dospołnje zbožowna běše tež 25lětna Němka Daniela Maier. W skicrossu bě wona poprawom jako štwórta do cila přišła­. Po někotrych mjeńšinach trajaceje widejoweje analyzy pak jury rozsudźi kónčny wuslědk korigować. Šwicarka Fanny Smith bě mjenujcy Němku na čarje z manewrom myliła, a Danieli Maier bu bronzowa medalja připóznata. Złoto doby faworitka Sandra Näslund ze Šwedskeje.

Naprašowanje WFV

Jednaćel Zapadołužiskeho koparskeho zwjazka (WFV) je minjeny tydźeń naprašowanje wudał, z pomocu kotrehož chce wón zwěsćić, hač něšto winowatostnym dypkowym hram dorosta spřećiwja. Tajke smědźa mjenujcy w starobnych klasach młodźiny G hač do młodźiny B přewjesć. Jednaćel WFV Gojko Sinde z toho wuchadźa, zo budu wšitke mustwa zaso pódla. Tak prosy wón hač do 25. februara jenož wo mejlku, njeje-li móžno so na dypkowych hrach wobdźělić, abo njejsu-li wěste.

Načolna koparska partija

We wyšej lize nastupi koparske mustwo Budissy Budyšin njedźelu pola VfL Halle­. Hosćićel steji po pjatnaće hrach ze 26 dypkami na 4. městnje, Budissa z dypkom wjac a hru mjenje na druhim.

Regionalna liga muži

18.02. 19:00 Tennis Borussia Berlin –

  FC Eilenburg

19.02. 13:00 VfB Auerbach –

  Germania Halberstadt

19.02. 13:00 Berlinski AK –

  Lok Lipsk

19.02. 13:00 BSG Chemija Lipsk –

  Hertha BSC II

20.02. 13:00 Union Fürstenwalde –

  FC Energija Choćebuz

20.02. 13:00 FSV 63 Luckenwalde –

  SV Lichtenberg 47

20.02. 13:00 Optik Rathenow –

  SV Tasmania Berlin

Wyša liga mužojo

19.02. 13:30 Čerwjeno-běli Erfurt –

  FC HŁ Neugersdorf

19.02. 13:30 VfB 1921 Kśišow –

  VFC Plauen

19.02. 13:30 SV 09 Arnstadt –

  Módro-běli Zorbau