Wałbrzych (dpa/SN). Spekulacije wo pozdatnych pokładach z časa nacizma w Pólskej so dale přiwótřeja. Po tym zo běchu tam pječa cyły ćah z tajkimi pokładami namakali, nawoda městneho muzeja twjerdźi, zo je wulki podzemski tunlowy system našoł. „Kompleks ma rozměry wulkoměsta“, rjekny Krzysztof Szpakowski sćelakej TVN24. W systemje móhło so „wšo móžne“ chować, hdyž tež nic na kóždy pad wony „złoty ćah“. Dwaj tunlej pola Wałbrzycha na juhu kraja do kompleksa wjedźetej. Szpakowski potwjerdźi, zo je wjele lět stare akty přeslědźił a so swědkow prašał. Nimo toho ma radarowe wobrazy.
System tunlow móhł dotal njeznaty dźěl nacistiskeho kompleksa „Riese“ być. Při tym dyrbješe za čas Druheje swětoweje wójny hač do 13 300 jatych z koncentraciskich lěhwow pod nječłowjeskimi wuměnjenjemi tunlowy system w horach juhozapadnje Wrócławja twarić. Tysacy přewažnje židowskich jatych zahiny- chu. Jako so sowjetska armeja bližeše, Němcy zachody tunloweho systema rozbuchnychu. Wot toho časa so wokoło tunlow wšelake legendy pletu.