ST Marijina hwězda
– HZ Rakecy II/Šćeńca 2:0 (1:0)
Zestawa domjacych: O. Schmidt – Wróbl, Škoda, Rab, R. Cyž, Peschmann (81. Čornak), Pjetaš, Hawš (73. P. Schmidt), Ch. Cyž, Zelnak (63. Eldor), Pakoßnick
Kermušnu njedźelu je prěnje koparske mustwo Sportoweho towarstwa Marijina hwězda cyłk Hrajneho zjednoćenstwa Rakecy II/Šćeńca pohosćiło. Načolnik wokrjesneje ligi, stafle 2 hraješe přećiwo poslednjemu. Přiwšěm běše to twjerdy worjech. Prěnje šansy přez Jakuba Zelnaka (12., 14., 22.) a Falka Peschmanna (29.) pak wostachu najprjedy raz bjez wuspěcha. Hižo zahe Pančičenjo hosći při hrajnym natwarje mylachu. Tak na přikład w 40. min., jako Peschmann přećiwnika myleše, a tón bul zhubi. Zelnak běžeše na to sam na wrota, je pak so wopak rozsudźił. Město ze zdalenosće šěsć metrow sam na wrota třělić přihra wón bul Jakobej Pakoßnickej. Wrotar pak jón popadny. 1:0 poradźi so domjacym hišće do połčasa. Matijas Wróbl bě hrajny nastroj wotpopadnył, a wšitcy přešaltowachu hnydom do nadběhoweho modusa. Tak dósta so kulowata koža přez Wróbla k Pakoßnickej, kiž wuhlada Christopha Cyža, a tón trjechi ze zdalenosće 14 metrow (42.).