Chrystof Gloxyn a Sokoł Ralbicy/Hórki cyle jednorje hromadźe słušataj. Wot dźěćatstwa hač do lońšeje sezony steješe 29lětny Gloxyn po mjezystaciji w Kamjencu přeco we wrotach delanskeho koparskeho towarstwa. Wot aktualneje hrajneje doby pak ma rodźeny Ralbičan, kiž bydli ze swójbu w Bretnigu-Hauswalde, nowy nadawk w Stadionje přećelstwa. Wón trenuje nětko prěnje mustwo Sokoła, kotrež hraje we wokrjesnej wyšej lize. Jurij Bjeńš je so z nim rozmołwjał.
Chrystofje, wot tuteje sezony trenuješ koparjow Ralbičanskeho prěnjeho mustwa. Kak je poprawom k tomu dóšło?
Ch. Gloxyn: Naš tehdyši trenar Jiří Krohmer je do Ćiska šoł, a tak pytachmy noweho nazwučowarja. Jako poprawny wrotar běch mustwo hižo hdys a hdys na hrach jako trenar přewodźał. Wothłós bě tehdy nimale přeco dobry a tak so z předsydstwom a mustwom na to dojednachmy, zo mam při liniji stać.
Sy z rozsudom dotal spokojom?