Minjeny kónc tydźenja steješe Radwor cyle w znamjenju kopańcy. Pjatk, sobotu a tež njedźelu zarjadowa a wuhotowa Sportowe towarstwo Radwor swój třeći halowy koparski turněr za dorostowych koparjow.
Zazběhowy turněr tworješe pjatk wječor w domjacej „Slaviji“ wubědźowanje młodźiny A. Mjez šěsć cyłkami přesadźi so na kóncu cyłk Póst Germanije Budyšin. Druhe městno wobsadźi mustwo ST 1922 Radwor a třeće ST 1896 Wulka Dubrawa.
Sobotu dopołdnja móžachu potom ći najmłódši hrajerjo pokazać, što hižo zamóža. W turněrje młodźiny F wobdźělichu so tohorunja šěsć cyłkow. Dobyćer rěkaše ST Hnašecy/Dobruša, slěbro wubědźi sej zastupnistwo hrajneho zjednoćenstwa Rakecy/Njeswačidło a třeće Wojerowski FC. Najlěpši hrajer turněra bu Mauritz Hausschild z Budissy Budyšina, najlěpši třělc Levi Heydan z HZ Rakecy/Njeswačidło a najlěpši wrotar Louis Resick z ST Hnašecy/Dobruša.