Dwójce hižo přewjedźechu wólnočasny turněr Worklečanskich koparskich přećelow na trawniku w Jaseńcy, w hali pak hišće nic. Do premjery we Worklečanskej ćěłozwučowarni pak mějachu wólnočasni wjesni koparjo najprjedy raz dwaj problemaj rozrisać, dokelž njemějachu přistup do towarstwoweje rumnosće a tak k posłužowanju wuslědkoweje tafle. Zarjadowarjo pak to najlěpše z toho sčinichu.
Wosom cyłkow je so nětko w modusu kóždy přećiwo kóždemu wubědźowało; mjez druhim tež młodźina C Módro-běłych Njeswačidło, kotraž pak so dorosćenych scyła njeboješe. Z wuběrnym wustupowanjom postara so wona wo wulke woči mjez přihladowarjemi.
Po 28 zetkanjach a něhdźe pjeć hodźinach hrajneho časa móžeše so team No Name z Pančic-Kukowa, kotryž bě hižo dwójce w Jaseńcy dobył, nad pokalom wjeselić. Druhe městno wobsadźi VSG Njeswačidło před prěnim mustwom Worklečanskich koparskich přećelow.