Bratislava (SŽ/K/SN). Stronu Hlas-Socialna demokracia bě něhdyši słowakski ministerski prezident Peter Pellegrini hakle před někotrymi měsacami załožił, tola młoduški politiski subjekt so dźiw hižo naležnje „słowa jima“. To da so bjeze wšeho z woprašowanja wolerjow sćěhować, kiž je agentura MEDIAN w druhim tydźenju wulkeho róžka přewjedła. Bychu-li so w kraju pod Tatrami nětko wólby parlamenta wotměli, by stronski nowačk mjenujcy nahladnych 21,7 procentow přihłosowanja dóstał a tak wólby jasnje za sebje rozsudźił. Druheho, dobyćerja poslednich wólbow hibanje OLaNO, z nažnjatymi 14,7 procentami, Hlas-SD z wulkim wotstawkom za sobu wostaja. Třeće městno by z 11, 8 procentami strona SaS docpěła. Ekstremnje prawicarska LSNS zlě wuwołaneho Mariana Kotleby spadnje z 9,2 procentomaj pod dźesatku; Něhdy knježaca strona Smer-SD dyrbi z 8,2 procentomaj spokojom być, a Progresiwne Slovensko móže ze 6,5 procentami ličić. Do Narodneje rady by z 5,6 procentami tež hibanje Sme rodina (swójba) přišło.