Pólska chce njewotwisny ameriski telewizijny sćelak w kraju wotstronić

Waršawa. Pólske knježerstwo přihotuje změnu medijoweho zakonja. Wotpowědny namjet knježaceje strony Prawo a sprawnosć (PiS) su tydźenja w sejmje zapodali, bjez toho zo bychu to z druhimi stronami koalicije wothłosowali. Hłowny dypk změny zakonja: Přichodnje smědźa w Pólskej jenož hišće sćelaki wusyłać, kotrež dóstawaja pjenježne srědki jeničce z krajow Europskeje unije.

Najbóle potrjecheny wot noworjadowanja by njewotwisny ameriski telewizijny sćelak TVN ze swojim informaciskim kanalom TVN24 był. Sćelak słuša medijowemu koncernej Discovery a je Waršawskemu knježerstwu napřećo kritisce nastajeny. Koncesija ameriskeje telewizije – dowolnosć wusyłanja – w septembru wuběži. Předsydstwo sćelaka je bjezradne. Zamołwići TVN wšak na to skedźbnjeja, zo ma Discovery w Nižozemskej swoju europsku centralu.